Sansar News
२७ असोज,वालिङ । स्याङ्जाको दक्षिण पश्चिम श्रीकृष्ण गण्डकी–६ दप्छेस्थित ध्रुवज्योति विद्यालयमा रहेको भूतपूर्व विद्यार्थी मञ्चले एम्बुलेन्स सेवा सुरु गरेको छ ।
विद्यालयमा अध्ययन गरेका भूतपूर्व विद्यार्थीले एम्बुलेन्स सेवा सञ्चालन र विद्यालयको शैक्षिक गुणस्तर वृद्धि गर्ने उद्देश्यले सामाजिक सञ्जालमार्फत आर्थिक सङ्कलन गरेका थिए ।
देश तथा विदेशमा रहेका भूतपूर्व विद्यार्थीबाट मात्रै हालसम्म रु ४० लाख सङ्कलन भएको र सोमध्ये रु नौ लाखबाट सुविधा सम्पन्न एम्बुलेन्स सेवा सुरु गरेको विद्यालयका प्रधानाध्यापक एवम् मञ्चका संरक्षक हिराबहादुर गाहा मगरले बताउनुभयो ।
“यस विद्यालयमा स्थापित भूतपूर्व विद्यार्थी मञ्चले निकै उदाहरणीय कार्य गरेको छ”, विद्यालयका प्रधानाध्यापक मगरले भन्नुभयो – “बाटो निकै अप्ठ्यारो र समयमा सवारी साधन नपाउनाले बिरामीको ज्यान जाने गरेको थियो अब केही हदसम्म समस्याको समाधान हुने देखेको छु ।”
रु २७ लाख लागत रहेको उक्त एम्बुलेन्स भन्सार छुटमा रु नौ लाखमा ल्याइएको विद्यालयले जनाएको छ । अहिले पनि आर्थिक सङ्कलनको अभियान जारी रहेको छ । रासस
वि.सं.२०७३ असोज २७ बिहीवार १३:५८ मा प्रकाशित
