Sansar News
३ कात्तिक, पेरिस, फ्रान्स । संयुक्त राष्ट्रसङ्घको सैक्षिक वैज्ञानिक र सांस्कृतिक मामिला हेर्ने सङ्गठन (युनेस्को) को कार्यकारी समितिले मङ्गलबार पारित गरेको प्रस्तावले जेरुसेलमस्थित धार्मिक स्थलहरूसँगको यहुदी धर्मावलम्बीहरूको गहिरो ऐतिहासिक सम्बन्धलाई अस्वीकार गरेको इजरायलले जनाएको छ ।
युनेस्कोद्वारा अनुमोदित उक्त प्रस्ताव इजरायली सरकार यहाँका यहुदी धर्मावलम्बीसहित विश्वकै यहुदी समुदायको मन तोड्ने किसिमको रहेको इजरायलको दाबी छ ।
युनेस्कोको मङ्गलबार बिहानको बैठकले गत हप्ता राष्ट्रसङ्घीय आयोगद्वारा पास गरेको सङ्कल्प प्रस्तावलाई पारित गरेपछि इजरायलले राष्ट्रसङ्घको उक्त प्रस्तावबाट चिढिएको छ ।
प्रस्तावले जेरुसेलम आफैँमा प्रत्यक्ष प्रभाव पार्ने त अपेक्षा गरिएको छैन तर यसले युनेस्कोलाई भने विवादमा तानेको छ । बजेट विनियोजनको विषयलाई लिएर जापान र चीनबीच कूटनीतिक विवादमा फसेको युनेस्कोका लागि यो विषय अर्को समस्याका रूपमा खडा भएको छ ।
‘अकुपाइड प्यालेस्टाइन’ नाम दिइएको सङ्कल्प प्रस्तावका कारण विगत केही दशकदेखि इजरायलले युनेस्को आफूप्रति पूर्वाग्रही बनेको बताउँदै आएको छ ।
युनेस्कोले प्यालेस्टाइनलाई सन् २०११ मा सदस्यता प्रदान गरेपछि इजरायलको युनेस्कोसँगको सम्बन्धमा थप समस्या उत्पन्न भएको छ ।
सङ्कल्प प्रस्तावकै विषयलाई लिएर भएको विवादपछि इजरायलद्वारा युनेस्कोसँगको सम्बन्ध निलम्बन गरिएको जनाएको थियो । एपी
वि.सं.२०७३ कात्तिक ३ बुधवार ०३:२६ मा प्रकाशित
