३ कात्तिक, बर्लिन (जर्मनी) । रसियाका राष्ट्रपति भ्लादिमिर पुटिन युक्रेन समस्याबारे बर्लिनमा हुने सम्मेलनमा सहभागी हुन बुधबार जर्मनी जानुहुने भएको छ ।
पुटिनको बर्लिनमा युरोपेली मुलुकका नेताहरू जमघट हुने सम्मेलनमा सहभागिता युरोप अमेरिकालगायतका केही विश्व समुदायले रसियाद्वारा सिरिया र युक्रेनमा देखाइरहेका फरक गतिविधिबारे रसियाको आलोचना गरिरहेका बेला आएको छ ।
बर्लिन सम्मेलनमा रसिया, फ्रान्स, जर्मनी र युक्रेनका नेताबीच सिरिया द्वन्द्व र रसियाद्वारा युक्रेनमा लगाइएको आर्थिक नाकाबन्दीबारे छलफल हुने बताइएको छ ।
रसियाली राष्ट्रपति पुटिनको जर्मनी भ्रमण सन् २०१४ मा युक्रेन र रसियाबीच आएको समस्यापछिको पहिलो हो ।
बर्लिन सम्मेलनमा रसिया र युरोपेली नेताहरूबीच युरोपको शान्तिका लागि भएको मिन्स्क शान्ति सम्झौताको कार्यान्वयन पक्षका बारेमा छलफल हुने बताइएको छ ।
बर्लिन सम्मेलनले युक्रेन समस्या समाधानका लागि ठूलो आसा गर्न नसकिने भन्दै युक्रेनी राष्ट्रपति पेट्रो पोरोसेन्कोले रसिया र युक्रेनबीचको सम्बन्ध सुधारका लागि पहल मात्र सुरु हुनसक्ने आफ्नो नर्वे भ्रमणका क्रममा बताउनुभएको छ ।
त्यसैगरी रसियाको केन्द्रीय प्रशासनिक केन्द्र क्रेमलिनका प्रवक्ता डिमित्री पेस्कोभले रसिया युक्रेनबीचको सम्बन्ध सुधारमा आफ्नो देश लागिपरे पनि युक्रेनबाट अपेक्षाकृत पहल नभएको बताउनुभएको छ ।
राष्ट्रपति पुटिन युक्रेन सहमतिको पालना गर्ने कुराको विकल्प नभएको बताए पनि समस्या सल्टाउन युक्रेनको अपेक्षाकृत सहयोग नदेखिएको पेस्कोभको दाबी छ । एएफपी
