Sansar News
२० फागुन, इश्लामावाद, पाकिस्तान । पाकिस्तानको दक्षिण पश्चिमी बलुचिस्तान प्रान्तमा मुसलधारे वर्षा हुँदा कम्तीमा छ जनाको मृत्यु भएको छ भने दर्जनौँ नागरिक घाइते भएको आइतबार पाकिस्तानी अधिकारीले जनाएका छन् ।
बलुचिस्तानमा मुसलधारे पानी र कतिपय उच्चपहाडी क्षेत्रमा हिमपातसमेत भएका कारण यहाँको सामान्य जनजीवन प्रभावित बनेको स्थानीय सञ्चारमाध्यमले जनाएका छन् ।
प्राप्त जानकारी अनुसार वर्षापछि कतिपय स्थानमा आएको बाढीका कारण होचोस्थानमा रहेका वस्तीहरू डुबान भएको छ भने कतिपय घरहरू भत्केका छन् । मृत्यु हुने अधिकांश महिला तथा बालबालिका रहेका र उनीहरूको करेन्ट लागेर वा बाढीका कारण भत्केका भवनका भग्नावशेषमा परेर मृत्यु भएको छ ।
बाढीका कारण कैयौँ सडक तथा रेलका लिकहरू डुबानमा पर्दा यातायात सेवासमेत अवरूद्ध बनेका छन् ।
बस्तीमा पानी पसेपछि भागेर सुरक्षित ठाँउमा पुगेका सयौँ जनता खुला आकाशमुनि बस्न बाध्य भएका छन् । मौसमविद्हरूले नदी किनार र होचो बस्तीमा थप बाढी तथा डुबान हुनसक्ने चेतावनी दिएपछि कैयौँ बस्तीका जनतालाई सुरक्षित स्थलतर्फ सारिएको छ ।
यसैबीच अफगानिस्तानको कान्दाहार प्रान्तमा शनिबार व्यापक वर्षापछि आएको बाढीमा परी १२ जना अफगानी नागरिकको मृत्यु भएको र १८ जना घाइते भएको स्थानीय समाचार संस्था तोलो न्यूजले जनाएको छ ।
वि.सं.२०७५ फागुन २० सोमवार ०९:५८ मा प्रकाशित
