हामी सबैकाे संसारन्यूज

२९ चैत, बेझाड ।  दुवै मिर्गौलामा समस्या देखिएपछि पीडित बनेका पाल्पा, निस्दी गाउँपालिका-१ डमराका रामबहादुर कार्कीको उपचारमा सहयोग जुटेको छ ।

बाकामलाङ घर भई हाल संयुक्त अरब इमिरेट्स युएईमा कार्यरत नेपाली युवाहरुबाट कार्कीको उपचारमा सहयोग जुटेको हो । राजकुमार पौडेल र बालु श्रेष्ठको नेतृत्वमा सङ्कलित रु एक लाख ३० हजार ७६५ कार्कीको उपचारका निम्ति सहयोग प्राप्त भएको छ ।

दुवै मिर्गौलामा समस्या देखिएपछि ५२ वर्षीय कार्की चार महीनादेखि भरतपुर मेडिकल कलेज चितवनमा उपचाररत् हुनुुहुन्छ । कार्कीको अवस्थालाई मध्यनजर राख्दै वैदेशिक रोजगारमा कार्यरत नेपाली युवाले आर्थिक सहयोग सङ्कलन गरेर पठाएका हुन् ।

सो रकम निस्दी गाउँपालिका-१ का अध्यक्ष पूर्णबहादुर खाँण र बालु श्रेष्ठकी श्रीमती विष्णु श्रेष्ठले भरतपुर मेडिकल कलेजमै पुगेर कार्कीलाई हस्तान्तरण गरे । कार्कीको उपचारमा सहयोगस्वरुप बाकामलाङ भजन समूहको तर्फबाट भेषबहादुर अधिकारीले रु पाँच हजार प्रदान गरेका छन् ।

कार्की विसं २०५४ को स्थानीय निर्वाचनमा साविक बाकामलाङ ७ बाट वडाध्यक्षमा निर्वाचित भएका छन् । हाल उनीबुद्धि विकास प्राथमिक विद्यालय व्यवस्थापन समितिको अध्यक्षलगायत विभिन्न सामाजिक क्षेत्रमा रहेर काम गर्दै आएका छन् ।

परिवारको प्रशस्त आयस्रोत नहुनु, उपचारमा लाखौँ रकम खर्च भइसक्दा पनि निको नहँुदा थप उपचारका लागि एक महीनाअघिदेखि कार्कीको उपचारमा समस्या परिरहेको छ ।