हामी सबैकाे संसारन्यूज

के दिन सक्छु र म ?

अक्षरहरूको माला
शब्दहरूको सङ्गालो बाहेक
कविताको उपहार
जन्मदिनको शुभकामना बाहेक

थाह छ तिमीलाई……..??

तिमी जन्मिनुको अर्थ,
कुनै बुडो रूखले पालुवा फेर्नु भन्दा कम होइन !
तिमी जन्मिनुको अर्थ,
शब्दहरूमा संगीत भर्नु भन्दा सहज होइन !

तिमी जन्मिनु,
देशले एक असल नागरिकको अपेक्षा साँच्नु हो
समाजले एक प्रख्यात् समाज सेवक हासिल गर्नु हो

तिमी जन्मिनु,
डाँडामा डुब्दै गरेको घामबाट क्षितिज हराउनु जस्तै हो
बाबु–आमाको सपनाहरूबाट त्यो चन्द्र ग्रहण हट्नु जस्तै हो

तिम्रो अनुहारमा ओसामा विन लादेनको
पाउडर घसेको नहोस्
जाकिर मुशाको लिपिस्टिक नहोस ओंठमा
र नहोस् जैसी अहमदको गाजल परेलीमा

तिमी जन्मिनुको कारणहरू
सोध,
तिम्रो पोषण भएको त्यो गर्भलाई
अनि
तिमीले चुसेको त्यो स्तनलाई

सोध,
तिम्रो बोझ बोकेको त्यो काँधलाई
अनि
निधारबाट बगेको पसिनाहरूलाई

सोधी हेर
आमाको पिडालाई
अनि
बाबुको मुस्कानलाई

तिमी हिँड्ने बाटोमा,
ठुलो शालिग होस ‘रतनलाल ब्राह्मण्ड’ को
अनि
उसको छायाँ ठिक तिम्रो टाऊकोमा !

कमाउनु–जमाउनुमा मात्र सिमित नरहोस्
तिम्रा क्रिया–कलापहरू
खानु, पिउनु र रमाउनुमा मात्र सिमित नहोस्
तिम्रा जीवन पद्धतिहरू

देशको करङ्ग भएर बाँच्नु पर्छ तिमी
इतिहासको पानामा हाँस्नु पर्छ तिमी

ता की,
तिमी जन्मिनुको ‘हेप्पी बर्थ डे’ मनाइयोस्
घाम, जुन, ताराद्वारा
न्वारन गरोस्–नामकरण गरियोस्
माटो, सहिद, अनि देशद्वारा

घर, गाऊँ, अनि समाजद्वारा !