हामी सबैकाे संसारन्यूज

रातभरको सपनाहरुले
दिनभरी म बिथोलिएको हुन्छु
अनि दिनभरका पसीनाका धाराहरुले
रातभर म भिजिएको हुन्छु
ती सपनाहरु ती पसीनाहरु
त्यो रातहरु अनि त्यो दिनहरु
भो चाहिएन मलाई अब ।
यहाँ दुनियाको स्वार्थका कचौरा
भरिएनन् कहिले
अनि म निःस्वार्थका थैली सिलाई रहेछु
ईश्वर पुज्नेहरु
होड़बाजीमा छन् मंदिरभित्र
अनि ईश्वरहरु विलापमा छन्
वृद्धाश्रमको आगनहरुमा ।
समयले कोल्टे फेरेकै रहेछ
तब त यहाँ
दिनहरु शुनसान अनि
रातहरु चहल पहल गर्छन्
घर घरमा टमी पप्पी
ज्याकी र टाईगर सजिएका छन् अनि
माली पुंड़ी दार्मी र पांग्रीहरु
गोठमा छैनन् ।
गोजी मै विश्व बोकेर
आँगन थर्काउनेहरु प्रशस्त छन्
विश्व को मानचित्र खोज्नेहरु
घुरेन लत्याएका छन् ।
भो ! यो मेरो संसार होइन रहेछ
यो संसारको म होईन रहेछु
मेरा पसीनाहरु
मेरा अभिलाषाहरु
मेरो मान्यताहरु
मेरो हिजो आज र भोलीहरु
म हराएको पाउँदैछु
भो चाहिएन मलाई अब
ती रातहरु ती दिनहरु ।