हामी सबैकाे संसारन्यूज

अर्काबाट थिचोमिचो यदि भए हेर्चाह राम्रो गरी
माया गर्छ छिमेकले नजिकको आफ्नो छमेकीप्रति ।
मात्रै स्वार्थ अभिष्ट साधन गरी मैमत्त-स्वामी बनी,
साथीको हक छिन्न उद्यत हुने कस्तो छिमेकी तिमी !

अर्काको घरखेत मिच्दछ भने त्यो गिद्धको कर्म हो,
मात्रै धार्मिक खोल ओड्दछ भने त्यो स्यालको धर्म हो
हेप्छौ सानु भनेर नै यदि भने के अर्थमा सानु भो !
मोटो लामु भएर हुन्न बुझिल्यौ, हो वीरता नै ठुलो ।

नेपाली मुटु हो फलाम, बढिया इस्पात दोब्रिन्न यो,
कच्चा धातुसमान देख्दछ भने देख्ने महामूर्ख हो ।
यो हो ढाल कडा विशाल सखुवा आँकेर आँकिन्न है,
मेवाको रुख संझिएर हँसिया रेटेर ढालिन्न है ।

हात्तीझैं बलियो छु, जित्न कसले के सक्दथ्यो ! भन्दछौ,
सानो जीव चढेर अङ्कुश लिई सुम्ल्याउँदा चेत्दछौ ।
सारै उच्च धनाढ्य मित्रद्वय छौ दायाँ र बायाँतिर,
हामीभित्र पसेन लालच कुनै टाहार बारीतिर ।

पाखा खेत रुखो तथा असजिलो गेग्र्यान होस् तापनि,
आफ्नो यो प्रिय मातृभूप्रति सदा हामी रहन्छौं ऋणी ।
तिम्रासामु कदापि भन्नुनपरोस् हामी भयौं निर्धनी,
आधा इन्च भएपनि स्वजननी छाड्दौन दुब्लो बनी ।

३ शार्दूलविक्रीडित छन्द