हामी सबैकाे संसारन्यूज

यदि तिमी छौ भने
फेरि एकचोटि तिम्रो
रौद्र रूप देखाईदेउ भोले
त्रिनेत्र खोली जटा फिजाई
ताण्डव गरि देखाइदेउ भोले ।

थर्काइदेउ यो ब्रम्हाण्ड सारा
खसाइदेउ धरतीमा
नभका जून तारा
चिरिदेउ हिमालका कठोर छातीहरूलाई
मोडिदेउ फेरि आकाशतर्फ
गंगाको बहावलाई ।

किनकि …
पापका रक्तबिजहरूबाट
उम्रिएका विरूवाहरू मौलाउदै
विकृतिका हाँगाविँगा फैलाएर
सर्वाङ्ग लपेटिसक्यो
यो धरतीलाई ।

घमण्ड ,लोभ र व्याभिचारका
किटाणुहरूले
भित्रभित्रै कुहाएर
पिप जस्तो दङ्गदङ्गी
गन्हाउन थाल्यो
यो सृष्टि ।

दंभ,हिंसा र घृणाको
असाध्य रोगले बौलाएर
क्रुरताका पराकाष्ठा
नाघिसके मानिसहरूले ।

यसैले..
तिम्रो रौद्र रूप
आवश्यक भयो अब,
सृष्टिको शुद्धीकरण
आवश्यक भयो अब ।

यदि तिमी साँच्चै छौ भने
फेरि एकचोटि तिम्रो
रौद्र रूप देखाइदेउ भोले
पापका रक्तबिजहरू मासेर
सृष्टिको शुद्धीकरण
गरिदेउ न भोले ।

जोरथाङ (दक्षिण सिक्किम ) भारत ।