हामी सबैकाे संसारन्यूज

आमाले पिठ्युबाट
डोको बिसाएर
गग्रेटोमा गाग्रो बिसाउँदै
खुइय्य सुस्केरा हालेर
पसिना पुस्दै
चुलोबाट भातको भाँडो ओरालेर
पस्किएको
मकैको भातको स्वाद जस्तो
कहाँ हुँदो रहेछ र
ग्यासमा पकाएको
बास्मती चामल,
पैसा भन्दा धेरै मूल्यवान छ
आमाको माया
त्यही मायामा बगेको यो मन
कत्ति बिचल्लित छ आज
नयाँ युग सँग ।।

याद त उही पुरानै हुँदो रहेछ
बिचारहरु तिनै आउँदा रहेछन्
याद हराएको मन
र याद भरिएको मन
बिचारको गहिराइ
उमेरको परिपक्वता सँगै
डाँडाका फेदीबाट च्याइरहने
कुहिरोको कुँडुलो जस्तै
उकुसमुकुस हुन्छ मन पनि
भरिएर होला
पोखिने ठाउँ नपाएर होला ।।

शब्दहरुमै डुबुल्की मारेर
खोज्छु भावनाको गहिराइ
छामेर अन्तर मन
तिनै बाल्यकालका यादहरु ।।