हामी सबैकाे संसारन्यूज

२३ फागुन, काठमाण्डौं । चीनको वुहान शहरबाट सुरु भएर संसारका झण्डै ८० देशमा फैलिएको कोरोना भाइरस (कोभिड– १९ को) त्रास संसारभरी फैलिएको छ ।

कोरोनाको संभावित जोखिम र कोरोना संक्रमणबाट बच्नका लागि विभिन्न देशले आ–आफ्ना तरिकाले कोरोना विरुद्ध लड्नका लागि तयार भएका छन् ।

यसैक्रममा संसारकै सबैभन्दा ठूलो सामाजिक संजाल फेसबुक र गुगल कम्पनीले आफ्ना कर्मचारीलाई विहिबार सन फ्रान्सिस्को र खाडी क्षेत्रका कर्मचारीलाई घरमै बसेर काम गर्न आग्रह गरेको छ । यी दुवै कम्पनीले आफ्ना कर्मचारीलाई कोरोना भाइरस संक्रमणको संभावित जोखिमबाट बचाउने उद्धेश्यले यस्तो आग्रह गरेको अन्तराष्ट्रिय समाचार एजेन्सी रोयर्टसले जनाएको छ ।

फेसबुकले मध्यपूर्वका सबै देशमा रहेका कर्मचारी र आकस्मिक कर्मचारीले शुक्रबार देखि घरमै बसेर काम गर्न आग्रह गरेको फेसबुकका प्रवक्ता एंथोनी ह्यारिसनले बताए ।

त्यस्तै गुगलले पनि बे एरियाका कार्यालयमा रहेका कर्मचारीलाई अफिसको विकल्प घरमै काम गर्न आग्रह गरेको छ ।

रोयर्टसका अनुसार माइक्रोसफ्टले पनि आफ्ना दुई कर्मचारी कोभिड १९ बाट प्रभावित भएको जनाएको छ ।  स्मरणरहोस् ट्विटरले पनि यसअघि नै आफ्ना कर्मचारीलाई घरमै रहेर काम गर्न आग्रह गरिसकेको छ ।