हामी सबैकाे संसारन्यूज

२३ फागुन, काठमाडौँ । सशस्त्र प्रहरी बल बि.ओ.पी. टांघनडुब्बा, झापामा कार्यरत सशस्त्र प्रहरी निरीक्षक खगेन्द्र चापागाई माथि मुद्दा दायर गरिएको छ ।

व्यापार व्यवसायमा सहजीकरण गरिदिने प्रयोजनको लागि घुस माग गरेको भन्ने उजुरीका सम्बन्धमा अनुसन्धान हुँदा बोर्डर आउट पोष्ट टांघनडुब्बाका सशस्त्र प्रहरी निरीक्षक चापागाईले सेवाग्राहीको व्यापार व्यवसाय गर्न सहज गरिदिने भनी पटक–पटक दुःख हैरानी दिई घुस माग गरिरहेको कारण अख्तियार दुरुपयोग अनुसन्धान आयोगको टोलीले निजलाई नियन्त्रणमा लिएको हो ।

अनुसन्धानको क्रममा निजले ५० हजार घुस लिन राजी भई घुस लिने उद्योग गरेको तथ्य पुष्टि हुन आएको देखिंदा निज चापागाईलाई भ्रष्टाचार निवारण ऐन बमोजिम हुने सजायको आधा सजाय हुन मागदाबी लिई आज विशेष अदालत, काठमाडौंमा आरोप–पत्र दायर गरीएको अख्तियारले जनाएको छ ।