हामी सबैकाे संसारन्यूज

‘कोरोना’ किन फैलियौ भुवनमा, कालै स्वरूपी बनी
पीडा त्रास बढ्यो समस्त जनमा, हल्ला चल्यो सन्सनी
‘कोरोना’ अति उच्च घातक छरे, सुन्दा नि सन्त्रास भो
राज्यैले अब दीर्घ सोच नगरे, के हुन्छ यो देशको
. (१)
मान्छे भो अति चट्पटे प्रकृतिमा, ज्यादै विकर्मी भए
भेटेका सब बस्तु ती भुवनका, सम्पूर्ण खादै गए
काँचा ती गँगटा र सर्प कछुवा, खाँदा चमेरा पनि
के पच्थ्यो बिचरा शरीर भयले, तात्यो त्यसै हन्हनी
. (२)
त्यै बेला अति दुष्ट भाइरस ले, डेरा गर्‍यो पेटमा
फैल्यो चीन प्रदेशबाट सहजै, अन्यत्र ती देशमा
‘कोरोना’ अति सूक्ष्म भाइरस हो, धक्का दिने ज्यानमा
राखौ है सबले सतर्क पन लौ, संपूर्ण खान्पानमा
. (३)
हाम्रा संस्कृति नै अपूर्व तहका, क्या सौम्य संस्कार छ
गर्दैनौँ हग, कीस, स्वच्छ अति नै, हाम्रो ‘नमस्कार’ छ
धोई हात सदैव कन्चन बनी, खाना त सादा लिनू
जोडी हात प्रणाम मात्र गरियून्, भीड्भाडमा जोग्गिनू
. (४)
नेपाली मन दर्बिलो छ अति नै, डर्दैन कैले पनि
हाम्रा पूर्वज रक्त एन्टिबडि हुन्, मर्दैन कैले पनि
सारा ती भयबाट मुक्त रहनू, छौँ शक्तिशाली भनी
त्यो आत्मैबल उच्च पार्नू सबले, टर्नेछ कालै पनि
. (५)

-छन्द-शार्दूलविक्रीडित