हामी सबैकाे संसारन्यूज

१४ चैत, युएई । युएईमा समस्यामा परेका ३० नेपाली ट्याक्सी चालकलाई एनआरएनए (नेपाली एसोसियन) युएईले आर्थिक सहयोग गरेको छ ।
सारजाहस्थित इमिरेट्स ट्याक्सी क्याब कम्पनीमा कार्यरत उनीहरु कामबिहिन भएको तथा कम्पनीले तलब नदिएपछि खान बस्न समेत समस्या भएको जानकारी आएपछि एनआरएनए युएईले आर्थिक सहयोग गरेको हो ।

एनआरएनए युएईका बोर्ड अफ डाइरेक्टर रमेश श्रेष्ठले उनीहरु रहेको क्याम्पमै पुगेर नगद १५ सय दिरहाम र प्रतिव्यक्ति दुईवटा स्यानिटाइजर सहयोग गरेको जानकारी दिएका छन् ।

ओशो तथा फ्युचर म्यानपावरमार्फत १ लाख ५० हजारदेखि ३ लाख ३५ हजार रुपैयाँसम्म बुझाएर यूएई आएका उनीहरु केही समयदेखि कामबिहीन भएको र कम्पनीले तलब समेत नदिएकाले समस्या परेको समाचार सार्वजनिक भएको थियो ।

उनीहरुले आफ्नो समस्या नेपाली दूतावासमा पनि सुनाएको र कोरोना सङक्रमणको जोखिम रोकथाम तथा नियन्त्रणका लागि सबैतिर उडान स्थगित भएकाले उद्दारमा समस्या भएको दूतावासले जानकारी दिएको छ । उनीहरुसँगै समस्यामा परेका पाँच जनालाई भने उद्दार गरेर नेपाल पठाइसकेको दूतावासले बताएको छ ।