हामी सबैकाे संसारन्यूज

गैरआवासीय नेपाली संघ दक्षिण कोरियाले कोरोना भाइरस (कोभिड १९) को महामारी विरूद्धको लडाइँमा साथ दिने प्रतिबद्धता अनुसार पठाएको पीपीई लगायतका सुरक्षा सामाग्री काठमाडौँ आइपुगेको छ ।

४००० टेस्ट किट र ५०० वटा स्वास्थ्यकर्मीले लगाउने विशेष सुरक्षा उपकरण (पीपीई) लगायतका सामग्री काठमाडौँ आइपुगिसेको एनआरएनएका केन्द्रीय अध्यक्ष कुमार पन्तले बताए । उनका अनुसार एउटा किटबाट १० जनाको परीक्षण गर्न मिल्ने भएकाले ४० हजार नमुना परीक्षण गर्न सकिनेछ । यसले संक्रमण भएको ३ घण्टामै नतिजा पनि दिन्छ ।

त्यस्तै गैरआवासीय नेपाली संघको पहलमा संकलित सामग्रीहरु शनिबार काठमाडौँ आइपुग्ने पनि उनले बताएका छन् ।

उनी भन्छन् ‘चीनबाट पनि ५५० वटा आईआर थर्मोमिटर, २००० वटा पीपीई सेट, १७४०० केएन–९५ मास्क, ४७००० डिस्पोजेबल मास्क र ४०००० पञ्जा शनिबार काठमाडौँ आइपुग्दैछन् ।’ उनले यी काम सम्भव बनाउन अहोरात्र खट्ने कोरिया, चीन र मकाउका गैरआवासीय नेपाली संघका साथीहरु, त्यहाँस्थित दूतावास एवं नेपाल सरकारप्रति हार्दिक आभार व्यक्त गरेका छन् ।

नेपालमा कोरोनाबाट प्रभावित नेपालीहरुको सहयोगको लागि गैरआवासीय नेपाली संघ राष्ट्रिय समन्वय परिषद् दक्षिण कोरियाको संयोजन तथा त्यहाँरहेका भएका अभियन्ताहरुको सहकार्यमा सहयोग संकलन अभियान सुरु गरिएको थियो ।

अभियान सुरु गरेको चारदिनमै १४ करोड २६ लाख ३७ हजार सात सय ७९ वोन अर्थात् एक करोड ४० लाख ७९ हजार सात सय ७५ रुपैयाँ संकलन भएको थियो ।

मातृभूमिमा परेको विपतको घडीमा सहभागी भई प्रतिव्यक्ति २० हजार वोन बराबरको किट खरिद गरी सहयोग गर्न कोरियावासी नेपालीहरुलाई एनआरएनएले आग्रह गरेको थियो ।