हामी सबैकाे संसारन्यूज

२७ बैशाख, काठमाण्डौं । नेपालमा शनिबार (बैशाख २७ सम्म) ७२ हजार २३९ जनामा कोरोना परीक्षण गरिएको छ । जसमा पछिल्लो २४ घण्टामा १,७४२ जनामा परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ ।

मन्त्रालयका अनुसार आजसम्म पिसीआर प्रविधिबाट १६ हजार ३०९ र आरडिटी प्रविधिबाट ५५ हजार ९३० जनामा परीक्षण गरिएको हो । पछिल्लो २४ घण्टामा देशैभरी ८१७ वटा पिसीआर नमुना परीक्षण गरिएको छ । शुक्रबारको तुलनामा झण्डै ३०९ बढी हो ।

प्रदेश परीक्षण विवरण
त्यसैगरी प्रदेश नं १ मा ७,०५५, प्रदेश नं २ मा ५,८९०, बाग्मती प्रदेशमा ९,१०५, गण्डकी प्रदेशमा ६, ३७७, प्रदेश नं ५ मा ६, ६३८, कर्णाली प्रदेशमा ६, १७४ र सुदूरपश्चिम प्रदेशमा १४,६९१ जनामा आरडिटी प्रविधिबाट परीक्षण गरिएको हो ।

क्वारेन्टाइनमा रहनेको संख्या
हाल सातै प्रदेशमा विभिन्न क्वारेन्टाइनमा १४ हजार ५९२ जना रहेका छन् । जसमा प्रदेश नं १ मा १,४८६, प्रदेश नं २ मा १,३५५, बाग्मती प्रदेशमा २५४, गण्डकी प्रदेशमा ४६३, प्रदेश नं ५ मा ५,२२८ कर्णाली प्रदेशमा २,४५५ सुदूरपश्चिम प्रदेशमा ३,३५१ जना रहेको स्वास्थ्य मन्त्रालयले शनिबारको नियमित पत्रकार सम्मेलनमा जानकारी दिएको हो ।

आइसोलेशन र रेडजोनमा
त्यसैगरी हालसम्म आइसोलेसनमा १४३ जना रहेका छन् । जसमा उपत्यकामा २ जना र बाहिरका अस्पतालमा १४१ जना रहेका छन् । साथै आजसम्म रेडजोन (संभावित संक्रमति) मा रहेकाको संख्या ३४० पुगेको छ । पछिल्लो २४ घण्टामा ४ जना थपिएका हुन् । उनीहरुको कन्ट्याक ट्रेसिङ कार्य भइरहेको बताइएको छ ।

कुन प्रदेशमा कति संक्रमित
हालसम्म संक्रमित भएकामध्ये प्रदेश १ मा ३४, प्रदेश २ मा ३१, बाग्मती प्रदेशमा ७, गण्डकी प्रदेशमा २ प्रदेश ५ मा ३० र सुदूरपश्चिम प्रदेशमा ५ जना संक्रमित भएको तथ्यांक रहेको छ । सातैवटा प्रदेशमध्ये कर्णाली प्रदेशमा अहिलेसम्म संक्रमित भेटिएका छैनन् । हालसम्म १०९ जना संक्रमति भेटिएका छन् ।

आज थपिएका ७ सहित संक्रमति हुनेको संख्या १०९ पुग्यो
आज बिहान थपिएका थप ७ जनासहित नेपालमा हालसम्म कोरोना संक्रमितको संख्या १०९ पुगेको छ । स्वास्थ्य तथा जनसंख्या मन्त्रालयका अनुसार आज (शनिबार) राष्ट्रिय जनस्वस्थ्य प्रयोगशाला टेकु र कोशी अस्पताल विराटनगरको प्रयोगशालामा गरिएको परीक्षणमा ७ जनामा संक्रमण पुष्टि भएको हो ।
उनीहरुमा उदयपुरको भुल्केका १८,४५ र ६५ वर्षीया महिला, कपिलवस्तुका १७, १८, १८ वर्षीय पुरुष र पर्सा छपकैयाका ६२ वर्षीय पुरुषमा संक्रमण देखिएको मन्त्रालयले जनाएको छ ।

आज थप ७ जनामा कोरोना संक्रमण भएको पुष्टि, संक्रमतिको संख्या १०९ पुग्यो

१०९ जनामा ३१ जना डिस्चार्ज ७८ जनाको विभिन्न अस्पतालमा उपचार
संक्रमित १०९ जनामध्ये ७८ जनाको विभिन्न अस्पतालमा उपचार भइरहेका छन् । जसमा रुपन्देही ६, नेपालगन्ज २४, भरतपुर १, विरगन्ज २७ र विराटनगर अस्पतालमा २० जना गरेर जम्मा ७८ जनाको उपचार भइरहेको छ । उनीहरुको अवस्था सामान्य रहेको पनि मन्त्रालयले जानकारी दिएको छ ।

संक्रमण भएका १०९ मध्ये ३१ जना उपचार गरेर घर फर्किएका छन् । शुक्रबार धनगढीको सेती अस्पतालमा उपचाररत एक महिला ३५ दिनपछि डिस्चार्ज भएकी हुन् । दुवईबाट आएका उनका देवरमार्फत् उनमा भाइरस सरेको थियो । उनीसँगै हालसम्म डिस्चार्ज हुनेको संख्या ३१ पुगेको हो ।

पिसीआर टेष्टको दायर व्यापक रुपमा बढाइने
मन्त्रालयले हाल ५० हजार भन्दा बढी कीट मौज्दात रहेकोले पिसीआरको नमुना व्यापक रुपमा बढाउने भएको छ ।
मन्त्रालयका अनुसार बढी प्रभावित जिल्ला उदयपुर, पर्सा, रौतहट, वारा र प्रदेश नम्बर ५ को नेपालगन्ज, रुपन्देही कपिलवस्तु लगायतका जिल्लामा ५३०० भन्दा बढी पिसीआर नमुना परीक्षण गरिने भएको छ । त्यसका लागि स्वास्थ्य मन्त्रालयका इपिडिमियोलोजी र नेपाली सेनाको स्वास्थ्यकर्मीको टोली ती जिल्लामा परिचालन भइसकेका छन् । उनीहरुले शुक्रबार ४०० नमुना संकलन तथा परीक्षण गरिसकेको र ३ दिनमा ५३ सय नमुना संकलन गरिने लक्ष्य रहेको पनि मन्त्रालयले जानकारी दिएको छ ।

सावधानी अपनाउन अनुरोध
बैशाख २४ गतेको मन्त्रिपरिषद्को बैठकले गरेको निर्णय अनुसार अब देशैभरी अत्यावस्यक सेवाहरु सूचारु भएका छन् । तरकारी, फलफूल, औषधि पसल लगायतमा जाँदा दूरी कायम गर्ने, राहत वितरणका ठाउँ, सार्वजनिकस्थल र कार्यालय प्रवेश गर्दा स्यानिटाइजरको प्रयोग तथा साबुन पानीले हात धुने र फलफूल तरकारी घर भित्राइसकेपछि राम्रोसँग पानीले धोेएर मात्र प्रयोग गर्न अनुरोध गरिएको छ ।  संक्रमण फैलन नदिनका लागि सकर्तकता अपनाउन र जिम्मेवार बनेर आफू पनि बच्ने र अरुलाई पनि संक्रमणबाट बचाउनका लागि मन्त्रालयले सबैमा अपिल गरेको छ ।

नेपालमा झण्डै ७० हजारमा कोरोना परीक्षण, संक्रमितको संख्या १०२, आइसोलेसनमा १३५ र रेडजोनमा ३३६ जना