१४ जेठ, काठमाण्डौं । नेपालमा बुधबार (१४ जेठसम्म) र्यापिड र पिसीआर प्रविधि दुवैबाट १ लाख ५८ हजार ५६४ वटा कोरोनाको नमुना परीक्षण गरिएको छ । जसमा पछिल्लो २४ घण्टामा ५,८०० वटा नमुना परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ ।
मन्त्रालयका अनुसार आजसम्म पिसीआर प्रविधिबाट ५८ हजार २७७ र आरडिटी प्रविधिबाट १ हजार २८७ वटा नमुना परीक्षण गरिएको हो । जसमा पछिल्लो २४ घण्टामा ३,५८० पिसीआर र २,२२० र्यापिड परीक्षण गरिएको छ ।
प्रदेश परीक्षण विवरण
त्यसैगरी प्रदेश नं १ मा ११,२५२ प्रदेश नं २ मा ६,५६९, बाग्मती प्रदेशमा २४,६८० गण्डकी प्रदेशमा ७,९५० प्रदेश नं ५ मा १७,४३९ कर्णाली प्रदेशमा ११,३५२ र सुदूरपश्चिम प्रदेशमा २१,०४५ वटा नमुना आरडिटी प्रविधिबाट परीक्षण गरिएको हो ।
क्वारेन्टाइनमा रहनेको संख्या
हाल सातै प्रदेशमा विभिन्न क्वारेन्टाइनमा ७० हजार ३०५ जना रहेका छन् । जसमा प्रदेश नं १ मा १,८६८ प्रदेश नं २ मा १२,१८३ बाग्मती प्रदेशमा १,३९८, गण्डकी प्रदेशमा १,९३०, प्रदेश नं ५ मा २६,७२९, कर्णाली प्रदेशमा ९,६०९ र सुदूरपश्चिम प्रदेशमा १६,५८८ जना रहेको स्वास्थ्य मन्त्रालयले बुधबार (जेठ १४ गते) को नियमित पत्रकार सम्मेलनमा जानकारी दिएको हो ।
आइसोलेसन र रेडजोनमा
हालसम्म ७ प्रदेशका ४७ जिल्लाका विभिन्न अस्पतालमा ६९९ जना आइसोलेसनमा रहेका छन् ।
जसमा प्रदेश १ मा ७३, प्रदेश २ मा २२६, बाग्मती प्रदेशमा २७, गण्डकी प्रदेशमा ११, प्रदेश नं ५ मा ३२५, कर्णाली प्रदेशमा २५ र सुदूरपश्चिम प्रदेशमा १२ जना रहेका छन् । उनीहरुको अवस्था सामान्य रहेको बताइएको छ ।
त्यसैगरी हालसम्म रेडजोन (संभावित संक्रमित) मा रहनेको संख्या ४६४ पुगेको छ । पछिल्लो २४ घण्टामा ९ जना थपिएका छन् । उनीहरु पोखरा, विराटनगर काठमाण्डौं,सुर्खेत, पर्सा र झापाका रहेका छन् ।
आज ११४ जना नयाँ संक्रमित, संक्रमितको संख्या ८८६ पुग्यो
नेपालमा आजमात्रै ११४ जनामा कोरोना संक्रमण भएको पुष्टि भएको छ ।
स्वास्थ्य मन्त्रालयका अनुसार आज संक्रमण देखिएकामा धरान स्वास्थ्य विज्ञान प्रतिष्ठानको प्रयोगशालामा गरिएको परीक्षणमा ११ जना संक्रमित भेटिएका छन् । उनीहरुमा सप्तरीको बोडे बसाई नगरपालिकाका १८ देखि ५६ वर्षीय ८ जना पुरुष, सप्तरीकै बालनबेहल गाउँपालिकाका २ जना १७ वर्षीय महिला र २९ वर्षीय पुरुष तथा सुरुङा नगरपालिकाका २९ वर्षीय पुरुष रहेका छन् ।
त्यसैगरी कोशी अस्पतालमा गरिएको परीक्षणमा १७ जना संक्रमित भेटिएका छन् । उनीहरुमा झापा गौरदहका २६ र ४१ वर्षीय पुरुष, कचनकवल नगरपालिकाका १९ देखि ५७ वर्षीका १५ जना पुरुष रहेका छन् ।
त्यसैगरी हेटौडाका किटजन्य प्रयोगशालामा गरिएको परीक्षणमा ८ जना संक्रमित भेटिएका छन् । जसमा मकवानपुर हेटौडाकी २३ वर्षीय महिला, रौतहट गढीमाई नगरपालिकाका १७ देखि २९ वर्षीय ७ जना पुरुष रहेका छन् ।
त्यसैगरी पोखरा प्रादेशिक अस्पतालमा गरिएको परीक्षणमा बाग्लुङ दमानखोला गाउँपालिकाका ६ जना २१,२१,२१,२७ वर्षीय पुरुष र बडिगाड गउँपालिका १९ र २० वर्षीय पुरुष रहेका छन् ।
राप्ती स्वास्थ्य विज्ञान प्रतिष्ठान दाङमा गरिएको परीक्षणमा १८ जना संक्रमित पुष्टि भएका छन् । जसमा रुकुमपुर्व पुथा उत्तरगंगा गाउँपालिकाका १५ वर्षीया महिला र १८ र २३ वर्षे पुरुष, दाङ घोराहीका २४ देखि ४२ वर्षका ७ जना पुरुष, लमही नगरपालिकाका १७ देखि ३० वर्षीय ८ जना पुरुष र १ महिला रहेका छन् ।
भेरी अस्पताल बाँकेमा गरिएको परीक्षणमा १६ जना पुष्टि भएका छन् । जसमा बाँके डुडुवा गाउँपालिकाका २१ र ३० वर्षीय पुरुष, राप्ती सोनारीका १९ देखि ४० वर्षका ७ जना पुरुष, बैजनाथ गाउँपालिकाका २४ देखि ४६ वर्षका ६ जना पुरुष र खजुरा गाउँपालिकाका २१ वर्षीय पुरुष रहेका छन् ।
आजमात्रै ११४ जनामा कोरोना संक्रमण, नेपालमा संक्रमितको संख्या ८८६ पुग्यो
त्यसैगरी राष्ट्रिय जनस्वास्थ्य प्रयोगशाला टेकुमा गरिएको परीक्षणमा ३८ जनामा संक्रमण पुष्टि भएको छ ।
जसमा सिराहा सिद्धीचरणका ३९ वर्षीय पुरुष, सिराहाकै हाल रुपनी सप्तरीमा रहेका ३७ वर्षीय पुरुष, वारा पचौटा नगरपालिकाका २५ वर्षीया महिला सहित ८ जना रहेका छन् । जो ७ जना २२ देखि ४१ वर्षका पुरुष रहेका छन् ।
रौतहट गौरका ३५ वर्षीया महिला सहित ८ जना संक्रमित पुष्टि भएका छन् । जसमा १८ देखि ३० वर्षका ७ पुरुष रहेका छन् ।
रौतहटकै देवाही वुनाही नगरपालिकाका २१ र ३५ वर्षे पुरुष, कटरिया नगरपालिकाका २७ र २६ वर्षीय पुरुष, रौतहट श्रीजनता सेकेण्डरी स्कुलमा गरिएको नमुना संकलनमा १४ जनामा संक्रमण देखिएको छ । जसमा १७ देखि ५० वर्षीय पुरुष र मदरासामा गरिएको नमुना संकलनमा २ जना, १३ र ३५ वर्षीय पुरुष रहेका छन् ।
आज थपिएका ११४ जनासँगै नेपालमा ८८६ जना संक्रमित भएका छन् । जसमा ७९८ पुरुष र ९० जना महिला रहेका छन् ।
कुन प्रदेशमा कति संक्रमित ?
स्वास्थ्य मन्त्रालयका अनुसार आजसम्म संक्रमित व्यक्ति भेटिएका मध्ये प्रदेश १ का ७ जिल्लाका १०३ जना, प्रदेश २ का सबै जिल्ला (८) का ३२४ जना, बाग्मती प्रदेशका ११ जिल्लाका ३९ जना, गण्डकी प्रदेशका ४ जिल्लाका १३ जना, प्रदेश नं ५ का ९ जिल्लाका ३६५, कर्णाली प्रदेशका ३ जिल्लाका २५ जना र सुदूरपश्चिम प्रदेशका ५ जिल्लाका १७ जना रहेका छन् । जसमा पुरुष ७९६ जना र ९० जना महिला रहेका छन् ।
हालसम्म कूल ८८६ जना रहेका छन् भने हालसम्म ४७ जिल्लामा संक्रमित पुष्टि भएका छन् ।
आज २८ जना निको भएर घर फर्किए
नेपालमा आजमात्रै २८ जना कोरोना संक्रमित निको भएर घर फर्किएका छन् ।
स्वास्थ्य मन्त्रालयका अनुसार पछिल्लो २४ घण्टामा निको भएर घर फर्किएकामा नारायणी उपक्षेत्रीय अस्पतालमा उपचाररत पर्साका २१ जना रहेका छन् । उनीहरुमा डेढ वर्षका बालकसहित ६६ वर्ष उमेर सम्ुहका रहेका छन् । उनीहरु ५ महिला र १६ पुरुष रहेका छन् ।
त्यसैगरी कोशी अस्पतालबाट ४ जना निको भएर घर फर्किएका छन् । उनीहरु उदयपुरका हुन् । १७ देखि ३६ दिनमा डिस्चार्ज भएका उनीहरुमा ३ महिला र १ पुरुष रहेका छन् ।
आजमात्रै २८ जना कोरोना संक्रमणबाट मुक्त भएर घर फर्किए, निको हुनेको संख्या १८३ पुग्यो
त्यसैगरी बाँकेको सुशील कोइराला क्यान्सर प्रखर अस्पतालमा उपचाररत ३ जना रहेका छन् । उनीहरु बाँकेका २४ वर्षीय पुरुष र ५५ वर्षीया महिला रहेका छन् । उनीहरु ११ देखि २२ दिनको अस्पताल बसाईपछि डिस्चार्ज भएका हुन् ।
त्यस्तै बर्दियाकी ११ वर्षीया बालिका पनि निको भएर घर फर्किएकी छन् ।
कुन प्रदेशमा कति निको भए त ?
स्वास्थ्य मन्त्रालयका अनुसार बुधबार डिस्र्चाज भएका २८ जना सहित नेपालमा कोरोना संक्रमणबाट निको हुनेको संख्या १८३ पुगेको छ ।
जसमा प्रदेश नम्बर १ का ३०, प्रदेश २ का ९७, बाग्मती प्रदेशका ११ जना, गण्डकी प्रदेशका २ जना, प्रदेश ५ मा ३८ र सुदूरपश्चिम प्रदेशमा ५ जना गरी १८३ जना हालसम्म डिस्चार्ज भएका छन् । जसमा १४२ पुरुष र ४१ जना महिला निको भएर घर फर्किएका हुन् ।
संक्रमणबाट हालसम्म ४ को मृत्यु
नेपालमा कोरोना संक्रमणबाट मृत्यु हुनेको संख्या ४ पुगेको छ । नेपालमा जेठ ४ गते मृत्यु भएका ७० वर्षीय पुरुषमा कोरोना संक्रमण भएको पुष्टि भएको छ । उनको संक्रमणबाट मृत्यु भएको पुष्टि स्वास्थ्य मन्त्रालयले जेठ १२ गते गरेको थियो ।
स्वास प्रश्वासमा समस्या भएर गत जेठ २ गते विरगन्जको नेशनल मेडिकल कलेजमा भर्ना भएका उनको आइसीयुमा राखेर उपचार गर्ने क्रममा जेठ ४ गते मृत्यु भएको थियो । उनमा कोरोना संक्रमणको आशंकमा नारायणी अस्पतालमा गरिएको परीक्षणमा संकास्पद देखिएपछि पुनः राष्ट्रिय जनस्वास्थ्य प्रयोगशाला टेकुमा गरिएको परीक्षणमा उनमा कोरोना संक्रमण भएको पुष्टि भएको थियो । हाल उनको सम्पर्कमा रहेका सबैको कन्ट्रयाक ट्रेसिङ गरेर परीक्षणको क्रम चलिरहेको पनि स्वास्थ्य मन्त्रालयले जनाएको छ ।
यसअघि जेठ ७ गते गुल्मी मदानेका ४१ वर्षीय शिक्षकको रुपन्देहीको क्रिमशन अस्पतालमा उपचारका क्रममा मृत्यु भएको हो ।
जेठ ४ गते बाँके नरैनापुरका २५ वर्षीय युवाको क्वारेन्टाइनमै रहेका बेला मृत्यु भएको थियो भने जेठ १ गते सिन्धुपाल्चोककी २९ वर्षीया सुत्केरी महिलाको धुलीखेल अस्पतालमा उपचारको क्रममा मृत्यु भएको थियो । उनको कोरोना संक्रमणबाट मृत्यु भएको घोषणा जेठ ३ गते गरिएको थियो । उनी कोरोना संक्रमणबाट नेपालमा मृत्यु हुने पहिलो व्यक्ति हुन् ।
नेपालमा साढे ५४ हजार पिसीआर परीक्षण, कोरोना संक्रमित ७७२, आइसोलेशनमा ५२२ जना, यस्तो छ अन्य अपडेट
वि.सं.२०७७ जेठ १४ बुधवार १८:५५ मा प्रकाशित
