हामी सबैकाे संसारन्यूज

३१ जेठ, अमेरिका । अमेरिकामा कोरोना संक्रमण र त्यसले नेपाली समुदायमा पुर्याएको असरमा त्यहाँस्थित नेपाली संघसंस्थाले आ- आफ्नो क्षेत्रबाट राहत तथा उद्धारका कार्यमा निरन्तरता दिएका छन् ।

त्यहि मध्ये एक हो नेपाल आदिवासी जनजाति महासंघ अमेरीका ( फिप्ना) पनि । फिप्नाले कोरोना संक्रमणको जोखिमका बीच पनि कोरोनाबाट प्रभावित त्यहाँका नेपाली समुदायबीच राहत तथा उद्धार कार्यमा निरन्तरता दिएको छ ।

फिप्नाले त्यहाँस्थित विभिन्न संघसंस्थासँग मिलेर तथा छुट्टै पनि राहत वितरण तथा अन्य कार्यमा संलग्न रहँदै आएको छ । फिप्नाले हालै पनि पिपिइ सामग्री उपलब्ध गराइएको छ । यो फिप्नाद्धारा सामुहिक रूपमा वितरण गरिएको पाँचौं चरणको कार्यक्रम हो ।

जस अन्तर्गत युनाईटेड किराँत राई अर्गनाईजेसन अफ अमेरीकाद्धारा उपलब्ध गराइएको सर्जिकल माक्स २५० थान, पन्जा १ हजार थान, घ्यालसुम्धो सेवा संस्था अमेरीकाद्धारा सर्जिकल माक्स ५० थान र पन्जा १ हजार थान, नुब्री एसोसिएशन अमेरीकाद्धारा पन्जा १ हजार थान, गुरूङ तमु सोसाइटी ईङक अमेरीकाद्धारा सर्जिकल माक्स ५० थान र पन्जा १ हजार थान, मुगुम एसोसिएशन अमेरीका सर्जिकल माक्स ५० थान र पन्जा ६ सय थान उपलव्ध गराएको छ ।

ती सामग्रीहरु संयुक्तरुपमा वितरण गरिएको पनि फिप्नाका अध्यक्ष लोक चेम्जोङले जानकारी दिएका छन् ।
त्यसैगरी तामाङ सोसाइटी अफ अमेरीका ( कोभिड १९ टाक्सफोर्स) द्धारा सर्जिकल माक्स ५० थान र पन्जा ६ सय थान, शेर्पा संघ अमेरीकाद्धारा सर्जिकल माक्स ४६ थान र पन्जा २ सय थान तथा आवस्यकता अनुसार दिनको ४-५ परिवारलाई आवश्यक सामग्री निरन्तर वितरण गर्दै आइरहेका छन् ।