हामी सबैकाे संसारन्यूज

चिन्ता मात्र लिएर बस्दछ भने, आशा सबै मर्दछन्
पार्दा चित्त छिया छिया सब जना, आघातमा पर्दछन्
चिन्ताको भुमरी भयानक हुँदा, जन्जालमा फस्दछ
चिन्ता चिन्तनमा बदल्न नसके, सोचेर बेकार छ ।
(१)
चिन्ता सागरबीच तीव्र गतिको, डुङ्गा भनी जान है
जान्दैनौ यदि लौ खियाउन भने, डुब्ने छ सम्मान है
चिन्ता यो न त नाप्न भर्न अथवा, जोख्नै कहाँ मिल्दछ
चिन्ता चिन्तनमा बदल्न नसके,सोचेर बेकार छ ।
(२)
चिन्ता त्याग्छु भनेर मानिसहरू, बोल्दै हिंडे ता पनि
सन्तोषी नहुँदा र दम्भ लिइँदा, गिर्दै गयो जीवनी
आकाङ्क्षा मनको र भाव दिलको, बढ्दै लगातार छ
चिन्ता चिन्तनमा बदल्न नसके, सोचेर बेकार छ ।
(३)
कस्तो चित्त अहो ! चिताउन यहाँ, सक्ने छ घाती कुरा
चिन्ता बिस्कुन यो कुरेर कहिल्यै, सप्रन्न ती आँकुरा
चिन्ता चित्त जलाउने जहर हो, यस्को त के काम छ
चिन्ता चिन्तनमा बदल्न नसके, सोचेर बेकार छ ।
(४)
चिन्ता त्याग्न सकिन्न एक पलमा, यो दुस्खको धड्कन
ज्यादा धृष्ट विचार लोभ चुलिँदा, चिन्ता बढ्यो झन्झन
चिन्ता आँगनमा कुरेर यसरी, बस्दा त चीत्कार छ
चिन्ता चिन्तनमा बदल्न नसके, सोचेर बेकार छ ।
(५)
छन्द शार्दूलविक्रीडित