Sansar News
काठमाडौँ । गीतकार गोपालचन्द्र राईको ‘सुँगुरे माया’ को म्युजिक भिडियो सार्वजनिक भएको छ ।
Takmebudha.com युट्युब च्यानलमार्फत भदौ १५ गते सार्वजनिक गरिएको उक्त म्युजिक भिडियोमा गायक रूप कुमार राईको स्वर, सङ्गीत तोरेम्पा हाङ र सङ्गीत संयोजन फणीन्द्र राईले गरेका छन् ।
भिडियोमा चर्चित हास्य कलाकार विल्सन विक्रम राई (तक्मे बुढा)का साथै सुरेन्द्र केसी (मुलाको साग) र अन्जली अधिकारीको अभिनय रहेको छ भने नवराज उप्रेतीको नृत्य निर्देशनमा चर्चित नृत्य निर्देशक कमल राई र सम्पादन मनोज कार्कीले गरेका छन् ।
‘नभुल्नु भन्छन् नुनको पैँचो, तिर्नु रे नुनैले
नतोड्नु भन्छन् बैगुनी मनलाई, मार्नु रे गुनैले’
गीतको शव्द रचना गोपालचन्द्र राईले गरेका हुन् भने स्वर रुपकुमार राईको रहेको छ । सार्वजनिक भएको ४ दिनमै करिब ३ लाख दर्शकले भिडियो हेरेका छन् ।
गरिबीपन र पछ्यौटेपनको कारण धेरै सन्तानहरू हुने तर आर्थिक अभाव भएको कारण झर्काे फर्काे गर्ने बैसको मायालाई ‘सुङ्गुरे माया’ को संज्ञा दिएको गीतकार राईले बताए ।
नेपाल आयल निगम कर्मचारी संघको आधिकारिक ट्रेड युनियनका अध्यक्ष रहेका गीतकार राईले केहि दिन अघिमात्र ‘रुँदारुँदै हासेको मान्छे’ म्युजिक भिडियो सार्वजनिक गरेका थिए । उनले ६०० भन्दा बढि गीतहरुमा आफ्नो स्वर दिइसकेका छन् ।
वि.सं.२०७७ भदौ १९ शुक्रवार १०:०८ मा प्रकाशित
