हामी सबैकाे संसारन्यूज

साहित्यकार गगन सिंह थापाको सातौं कृति ‘मरभूमिकी महारानी’ प्रकाशनका लागि उनका नाति सुहिम थापाले आफ्नो जीवनको पहिलो कमाई सहयोग गर्ने भएका छन् ।

हजुरबुवाको कृति प्रकाशन हुन लागेको जानकारी दिँदै सुहिमले एनआरएनएद्धारा आयोजित अन्तर्राष्ट्रिय बक्तित्वकला प्रतियोगिताबाट पुरस्कारस्वरुप पाएको रकम हजुरबुवाको कृति प्रकाशनका लागि सहयोग गर्न लागेको बताएका छन् ।

हजुरबुवा नै समाज, सभ्यता र संस्कृतिको ज्ञानको अदभुत खानी रहेको बताउँदै सामाजिक संजालमार्फत् सुहिमले भनेका छन्,

‘हजुरबुबा गगनसिंह थापाको सातौ कृति ‘मरुभूमिकी महारानी’ प्रकाशित हुँदै । मेरो हजुरबुबा मेरो, परिवार र समाजको आदर्श हो र मानवता के हो र के हुनुपर्छ भन्ने ज्वलन्त उदाहरण हो । शिक्षा, साहित्य, प्रजातान्त्रिक आन्दोलन, समाज बिकास र प्रकृति संरक्षणमा उहाँको योगदान अतुल्य रहेको छ ।
उहाँ हाम्रो समाज, सभ्यता र संस्कृतिको ज्ञानको अदभुत खानी हो र प्रेरणादायी लेखक पनि । एउटा कलम र सादा कपि सङ्गै उहाँले आफ्ना पाठकहरुलाई मस्तिष्क र आत्माको यात्रामा हिँडाउन सक्ने खुबी राख्नु हुन्छ ।

‘मेरो देशको लागि मैले देखेको सपना’ बिषयको एनआरएनएको अन्तर्राष्ट्रिय बक्तृत्वकला प्रतियोगिता बाट मैले पाएको पुरस्कार रकम जुन मेरो जीवनको पहिलो आय हो । हजुरबुबाको यो कृति मरुभूमीकी महारानी प्रकाशनमा लगाउन पाएकोमा म सार्है नै खुशी छु । किनकी मेरो हजुरबुबा मेरो आदर्श हुनुुहन्छ र म उहाँको एक असल बिरासत बन्न चाहान्छु ।’

१६ वर्षीय सुहिम हाल ११ क्लासमा पढ्दै छन् । उनी गैरआवासीय नेपाली अभियन्ता हिक्मत थापाका छोरा हुन् ।