Sansar News
जगत सारा शन्त्रास देख्दैछु मृत्यु शैयाबाट,
आमा म अन्तिम पत्र लेख्दैछु मृत्यु शैयाबाट ।
छट्पट्टीले अन्तर हृदय जल्छ देखेन कसैले,
बाँच्ने आशामा काल छेक्दैछु मृत्यु शैयाबाट ।
दुख्छ अनि पोल्छ मुटु रातदिन मरेर बाँच्दैछु,
आलो घाउ बारबार सेक्दैछु मृत्यु शैयाबाट ।
इच्छा त्यो भरोशाको फूल कन्दरामा फुलाउने,
त्यहि आकांक्षा चाहना टेक्दैछु मृत्यु शैयाबाट ।
हटेर गयो आशा मगमगाउँदै सुगन्ध फैलाउने,
अनि त आफ्नै जीवन मेट्दैछु मृत्यु शैयाबाट ।
बिपनाको खुशीमा रमाउने चाहना हराएपछि,
अवश्य सपनाको शैल थेग्दैछु मृत्यु शैयाबाट ।
वि.सं.२०७७ मंसिर २० शनिवार ०९:४९ मा प्रकाशित
