Sansar News
सँधै गाई बाख्रा हराइरहे भनेर
गलहत्याएकै हो गोठालोलाई लट्ठी खोसेर
कसैको थालमा धेरै
कतै औसानीसम्म हाल्न पुग्नेगरी भात दिने
पक्षपाती भान्सेलाई कटाएकै हो डाँडा
अहोरात्र मात्र भजन रटाइरहने शिक्षकलाई
आमूल काटछाँट गरेर
टिचर नाउँको चरा नियुक्त गर्दा पनि
उही ‘गोपी कृष्ण कहो’ रट्दैछन बबुरा बालकहरु
गंगाजललाई विस्थापन गरेर
पवित्र होली वाइनले आचमन गर्न सिकाउँदैछ
मन्दिरको नयाँ पुजारी
उस्तै …हैन अझै धेरै लथालिङ्ग छ घर आज
घामको न्यानो छिराउँन भत्काइदैछ
धमाधम घरका भित्ताहरु ।
वि.सं.२०७७ मंसिर २७ शनिवार ०८:४२ मा प्रकाशित
