Sansar News
समाज हाम्रो यशले सजाउँछु
अभिन्न माया जनमा दिलाउँछु
बनेछ आशा पलमा विखण्डित
छ लाज आफैँ पनि आज लज्जित ।१।
बिभिन्न खाले षडयन्त्रमा भुली
झुकाउँदैछौ शिर यो यसै गरी
प्रपञ्च ठूला दलमा छ निन्दित
छ लाज आफैँ पनि आज लज्जित ।२।
बनेर ज्ञानी जगमा सु–सज्जित
बिचार हाम्रा अति नै अलङ्कृत
थिए बिगार्यौ हुनु पर्छ दण्डित
छ लाज आफैँ पनि आज लज्जित ।३।
सुनेर केही जनभावनाहरू
विभेद फालौँ जन बीचमा बरू
हुदैन राम्रो नबनौँ प्रताडित
छ लाज आफैँ पनि आज लज्जित ।४।
थिए बहाना जनता रिझाउने
सु–योजनाले जगमा चिनाउने
रहेछ बाटो धन खान लक्षित
छ लाज आफैँ पनि आज लज्जित ।५।
छन्द वंशस्थ
वि.सं.२०७७ पुस ११ शनिवार १०:२० मा प्रकाशित
