हामी सबैकाे संसारन्यूज

जूनसँग जिस्कदाको
र किरणसँग खेल्दाको
आनन्द !
सत्ता दाउपेचको शिविर
र सुनको घरमा
सुनकै ढोका उघारेर
निस्कनेसँग
कहाँ सम्भव छ ?
झर्नाको शीतलता
र नागवेलीका घुम्तीको
मुस्कान !
आफ्नै समूहसँग
मन घोल्न नसकेर
छानो जलाउँदै
खरानी मन तापेको
मजामा
ओठ खुल्नेसँग
कहाँ सम्भव छ ?
पहरा चढ्दाको
र इन्द्रेणीसँग
लुकामारी खेल्दाको
महोत्सव
रगत पिएर आफूजस्तैको
र घाँटी रेटेर आफन्तको
भेडाझैँ\बकरेझैँ
जङ्गल अघाउँदै
घरभित्रको खोरमा
भर्खर जम्मा भएका
ताता समूहसँग
कहाँ सम्भव छ ?
सम्भव त त्यहाँ हुन्छ
जहाँ
जूनजस्ता मन
किरणजस्ता विचार
झर्नाजस्ता भावनामा
नागवेलीको धीरता
र इन्द्रेणी रङ्को
छाती फैलिएको छ !!!