Sansar News
माघ १५, काठमाडौं । सर्वोच्च अदालतले अदालतको अवहेलना मुद्दामा प्रधानमन्त्री केपी शर्मा ओलीलाई लिखित जवाफसहित स्वंय उपस्थित हुन आदेश दिएको छ । बिहीबार न्यायाधीश मनोजकुमार शर्माको एकल इजलासले अवहेलना मुद्दामा सात दिनभित्र लिखित जवाफ पेश गर्न प्रधानमन्त्री ओलीलाई आदेश दिएको हो ।
यसअघि प्रधानमन्त्री ओलीविरुद्व दायर अवहेलना मुद्दामा बहस गर्दै अधिवक्ता ओमप्रकाश अर्यालले ओलीलाई अदालतमै उपस्थित गराए जवाफ दिन माग गरेका हुन् । रिट निवेदकको माग बमोजिम अदालतले यस्तो आदेश गरेको हो ।
प्रधानमन्त्री ओलीले सर्वोच्च अदालतको संवैधानिक इजलासमा विचाराधीन मुद्दामाथि पटक–पटक सार्वजनिक रुपमा टिप्पणी गर्दै आएका छन् । उनले इजलासमा भईरहेको बहसलाई ‘तमासा’ भन्ने गरेका छन् ।
ओलीले बयोबद्ध वरिष्ठ अधिवक्ता कृष्णप्रसाद भण्डारीलाई पनि सार्वजनिक कार्यक्रमकै बीचमा ‘बाजे वकिललाई सर्वोच्च लगेर तमासा देखाए’ भन्ने टिप्पणी गरेका थिए ।
९४ वर्षिय वरिष्ठ अधिवक्तालाई लक्षित गर्दै गरेको टिप्पणीले समग्र न्यायपालिकामाथि अवहेलना गरेको जिकिर गर्दै वरिष्ठ अधिवक्ता कुमार शर्मा आचार्य र अधिवक्ता कञ्चनकृष्ण न्यौपाने रिट निवेदन दर्ता गराएका थिए।
सम्बन्धित समाचार
प्रधानमन्त्री ओली र चार पूर्वप्रधानन्यायाधीशविरुद्व परेका अवहेलनासम्बन्धी मुद्दामाथि सुनुवाई हुँदै
वि.सं.२०७७ माघ १५ बिहीवार १६:५७ मा प्रकाशित
