हामी सबैकाे संसारन्यूज

उपयोग गर
जब स्वार्थ पूरा हुन्छ
अनि,
टुकुचामा मिल्काईदेउ ।

राजनीतिमा
चरम उपयोगवाद
पहिले जनतालाई मूर्ख बनाउँछ
त्यसपछि भरेङ्ग बनाउँछ
अनि बुई चढेर
सनैसनै माथी उक्लिन्छ
जब सिंहासनमा पुग्छ
तब बिर्सिदिन्छ जनताको नुन र गुन ।

ए ! सन्कि शाषक
बालुवाको उच्च सिहासनमा बसेर
भारदारी सभा गरेर
आफुलाई बादशाह नठान
जुनदिन जनताहरु जाग्छन्
त्यो दिन तिम्रो अभिमानको धरहरा
गर्ल्याम गुर्लुम छिनमै ढल्छ
अनि,
न तिमी रहन्छौ न तिम्रो भारदार
रहन्छ केवल
कालो इतिहास ।

हो ! इतिहास साक्षी छ
जनताको मतमा
सिहासनमा बसेर
जनताकै अभिमत बिरुद्ध
कोहि आफुलाई बादशाह
कोहि तानाशाह बनेकाछन्
तर,
तिनका अन्त पनि दुःखद छन् ।

सिहासनमा बसेर
म स्वयम् राज्य हुँ
ढुकुटी, कानुन, जेल, पुलिस र सेना
सबै सबै मेरो अधीन छ
म जे पनि गर्न सक्छु
जसो पनि गर्न सक्छु
यसो सोच्नु र ठान्नु
क्षणिक आत्मरति बाहेक अरु के हुन सक्छ ?
मुर्खता बाहेक अरु के हुन सक्छ ?
ए ! तानाशाह
राज्य तिम्रो अधिनमा हुनसक्छ
तिम्रो आदेश मानेर चल्छ
तर हेक्का होस्
जनता सधैं सत्यको अधिनमा हुन्छ
न्यायको पक्षमा हुन्छ ।

ए ! सन्कि शाषक
बालुवाको उच्च सिहासनमा बसेर
भारदारी सभा गरेर
आफुलाई बादशाह नठान
जुनदिन जनताहरु जाग्छन्
त्यो दिन तिम्रो अभिमानको धरहरा
गर्ल्याम गुर्लुम छिनमै ढल्छ
अनि,
न तिमी रहन्छौ न तिम्रो भारदार
रहन्छ केवल
कालो इतिहास ।

यस्तै गरि,
आफ्नै अहम्, घमण्ड र अभिमानले
संसारका अनेक तानाशाह
सन्की बादशाह
र
मै हुँ भन्ने अभिमानीहरुको
पतन भएको छ
इतिहास साक्षी छ
त्यसैले,
ए ! शाषक
ए ! भारदार
इतिहासबाट शिक्षा लेउ
जनताको प्रिय बन ।