हामी सबैकाे संसारन्यूज

जीवनचक्रको न्यानो रेशममा गुट्मुटिएर
प्युपाभित्रको निष्क्रिय प्राणले
देख्छ सपना उम्रेको
त्यो निष्क्रिय शरीरबाट
सक्रिय पखेटा
उसको अल्पायु जिन्दगीको
यात्रामा छोटो तर मीठो यथार्थ भर्न ।
तोड्दै आफ्नै जालोलाई
उम्कन्दै खुल्ला आकाशमा
फिजाउदै ती सुन्दर पखेटा
प्युपा बाहिरको पुतालीले देख्छ विपना
युगले तिरस्कृत आफुजस्तै झुसिलकिराको मौन वेदना
शोषणको पैतालामुनि दबाएका उसको आत्मसम्मान
कोइली र जुरेलिको सुरम्य भेषमा
आएर लुछिएको उसको गौरव
रेशममा गुट्मुटिएका सुरक्षित उ
उन्मुक्तिको खोजमा निस्केका उन्मुक्त उ
शोषण र षड्यन्त्रको खुल्लमखुल्ला विरोध गर्न
उडिरहेको छ अनन्त आकाशमा आत्मासम्मानको
प्रतिस्पर्धा लड्दै ।