Sansar News
१७ चैत, काठमाडौं । सरकार र थारु कल्याणकारी सभा थारुहट÷थारुवान संयुक्त संघर्ष समिति केन्द्रीय आन्दोलनबीच पहिलो चरणको वार्ता सम्पन्न भएको छ ।
नेपाल सरकारका तर्फबाट गृहमन्त्री राम बहादुर थापा वादलको टोली र संघर्ष समितिका पदाधिकारीहरुबीच आज गृहमन्त्रालयमा भएको पहिलो चरणको वार्ता सकारात्मक रहेको प्रधानमन्त्रीका परराष्ट्र मामिला सल्लाहकार तथा वार्ता समितिका सदस्य राजन भट्टराईले जानकारी दिएका छन् ।
उनले दुवैतर्फको वार्ता सौहार्दपूण र सकारात्मक रहेको बताउँदै अर्को वार्ता छिट्ट बस्ने सहमति भएको जानकारी दिएका छन् ।
वार्तामा सरकारका तर्फबाट गृहमन्त्री राम बहादुर थापा ‘वादल’ प्रधानमन्त्रीका परराष्ट्र मामिला सल्लाहकार राजन भट्टराई, पूर्वसभासद् भगवती चौधरी र संघर्ष समितिका तर्फबाट प्रेमलाल चौधरी, पदम नारायण चौधरी, चन्द्रबहादुर चौधरी, प्रभात चौधरी रहेका छन् ।
संघर्ष समितिले १९ बुँदे माग राख्दै टीकापुर घटनाको अभियोग लागेका थारु कल्याणकारी सभाका अध्यक्ष धनीराम चौधरी, सांसद रेशम चौधरी लगायतको मुद्दा फिर्ता लिइनुपने, थारुहट आन्दोलनको क्रममा मारिएकाहरूलाई सहिद घोषणा गर्नुपर्ने लगायतका माग राखेका हुन् ।
वि.सं.२०७७ चैत १७ मंगलवार १६:३२ मा प्रकाशित
