Sansar News
२१ चैत्र, चितवन । Congratulations : गैडाकोट नगरपालिका वडा नं २ स्थित अक्सफोर्ड कलेज अफ इन्जिनियरिङ्ग एण्ड म्यानेजमेन्टलाई अन्तर्राष्ट्रिय अवार्ड प्राप्त भएको छ ।
एक अमेरिकन संस्थाले अक्सफोर्ड कलेजलाई ‘अन्तर्राष्ट्रिय बीज अवार्ड २०२०’ मा छनौट गरको हो । शनिबार कलेजमा आयोजित बिज अवार्ड तथा बास्केटबल उद्घाटन कार्यक्रमका अवसरमा कलेजलाई उक्त अवार्ड प्रदान गरिएको छ ।
कलेजले पढाईको गुणस्तर, म्यानेजमेन्ट, नेतृत्व र संस्थागत सामाजिक उत्तरदायित्व अन्तर्गत विभिन्न क्षेत्रमा महत्वपूर्ण योगदान दिएको भन्दै अक्सफोर्डलाई छानेको जनाएको छ ।
कार्यक्रममा प्रमुख अतिथि रहेकी भरतपुर महानगरपालिकाकी मेयर रेनु दाहालले अवार्ड प्राप्त गरेकोमा कलेजलाई बधाई दिँदै शिक्षा बिना देश समृद्ध नहुने भन्दै कोरोनापछिको विषम स्थितिमा कलेज विद्यालयहरुको भूमिका महत्वपूर्ण हुने बताइन् । उनले सो अवसरमा कलेजमा नवनिर्मित अन्तर्राष्ट्रियस्तरका बास्केटबल कोर्टको उद्घाटनसमेत गरेकी थिइन् ।
पोखरा विश्वविद्यालयका उपकुलपति डा. प्रेम नारायण अर्यालले यो अवार्डले कलेजको मात्र नभएर विश्वविद्यालयकै गरिमालाई उँचो बनाएको बताए । साथै उनले सबै कलेजहरुले शिक्षाको गुणस्तरमा सुधार गर्दै लानुपर्नेमा जोड दिए ।
कलेजका प्रिन्सिपल हरि भण्डारीले कार्यक्रममा बोल्दै विश्वका १३० देशहरु मध्येबाट अक्सफोर्ड छनौटमा परेको जानकारी गराएका थिए । उनले अक्सफोर्डले अन्तर्राष्ट्रिय अवार्ड प्राप्त गर्नुभनेको कलेजका लागि मात्र नभएर राष्ट्रकै प्रतिष्ठा र गौरवको विषय भएको बताए । उनले अवार्ड प्राप्त गरेपछि अझ जिम्मेवारी थपिएको बताए ।
कलेजले यसअघि जर्मन, अमेरिका, फ्रान्स, थाइल्याण्ड, भारत लगायतका संस्थाहरुबाट विभिन्न अवार्डहरु प्राप्त गरेको छ । सोही अवसरमा प्रिन्सिपल भण्डारीद्वारा लिखित सूचना प्रविधि, इकर्श र व्यवस्थापन सम्बन्धी ३ वटा पुस्तकको पनि विमोचन गरिएको थियो ।
वि.सं.२०७७ चैत २१ शनिवार १४:५४ मा प्रकाशित
