हामी सबैकाे संसारन्यूज

काठमाडौं । नेपाली कांग्रेसको चौधौ महाधिबेशनमा आगामी नयाँ नेतृत्वका लागि ५०९ जनाले उम्मेदवारी दिएका छन् ।

शुक्रवारदेखि राजधानीको भृककुटीमण्डपमा सुरु भएको कांग्रेसको चौधौ महाधिबेशको दोस्रो दिन नयाँ नेतृत्वका लागि भएको उम्मेदवारी मनोनयन दर्तामा पार्टीमा १३ पदाधिकारीसहित १३४ केन्द्रीय सदस्यका लागि ५०९ जनाको उम्मेदवारी दर्ता गरिएको हो ।

शनिवार विभिन्न पदका लागि गरिएको मनोनयन दर्तामा सभापति पदमा मात्रै ६ जनाको उम्मेदवारी दर्ता भएको छ । कांग्रेसको आगामी नेतृत्वका लागि नेताहरु शेरबहादुर देउवा डा. शेखर कोइराला, विमलेन्द्र निधि, प्रकाशमान सिंह, कल्याण गुरुङ र युवराज न्यौपानेले आफ्नो उम्मेदवारी दर्ता गराएका छन् । यद्यपी न्यौपाने र गुरुङले सभापतिबाट आफ्नो उम्मेदवारी फिर्ता लिएको बताइए पनि औपचारि रुपमा त्यसको घोषणा गरिएको छैन ।

नेपाली कांग्रेसको उम्मेदवारी अद्यावधिक सूचना अनुसार हालसम्म ५०९ जनाको उम्मेदवारी परेको हो । शनिवार विहान १० बजेदेखि बेलुका ५ बजेससम्म उम्मेदवारको मनोनयन दर्ता, ५ देखि ७ बजेसम्म मनोनयन उपर दावी विरोध तथा जाँचबुझ गरिएको र ७ देखि ९ बजेसम्म दावी विरोध उपर निर्णय गर्न सकिने बताइएको छ ।

त्यस्तै हालसम्म २ उपसभापतिका लागि महेश आचार्य, सुजाता कोइराला, डा. चन्द्र भण्डारी, धनराज गुरुङ, पूर्णबहादुर खड्का, दिवेश्वरी साह र विजयकुमार गच्छदारले उम्मेदवारी मनोनयन दर्ता गराएका छन् ।

त्यसैगरी २ महामन्त्रीका लागि विश्वप्रकाश शर्मा, डा. मिनेन्द्र रिजाल, गगन कुमार थापा, डा. प्रकाशसरण महत, डा. राजाराम कार्की, प्रदीप पौडेलले उम्मेदवारी दिएका छन् ।

आठ सहमहामन्त्रीका लागि बद्रिप्रसाद पाण्डे, फरमुल्लाह मन्सुर, मान बहादुर विश्वकर्मा, देवराज चालिसे, सुरेन्द्र प्रसाद चौधरी, किशोर सिंह राठौर, रन्जित कर्ण, जीवन परियार, विकास लामा, रामकृष्ण यादव, कमला पन्त र तेजुलाल चौधरी, जीवन साही, गंगा सुनार, महेन्द्र यादव, भीष्मराज आङदेम्बे, चेतराज बजाज, शेख वकिल, उमाकान्त चौधरी र डिना उपाध्याय गरी २० जनाले उममेदवारी दर्ता गराएका हुन् ।

त्यसैगरी सदस्यहरुमा थारुबाट १४, मधेशीबाट ३२, आदिवासी जनजातिबाट ८७, खसआर्यबाट ९३, दलितबाट ३९, महिलाबाट ३१, पिछडिएको क्षेत्रबाट २, अपांगबाट १६, अल्पसंख्यकबाट ६, मुस्लिमबाट १६, प्रदेश १ बाट १३, प्रदेश २ बाट ५, वागमती प्रदेशबाट ९, गण्डकी प्रदेशबाट ७, लुम्बिनी प्रदेशबाट ११, कर्णाली प्रदेशबाट ७, सुदूरपश्चिम प्रदेशबाट १२ र खुल्लाबाट १०९ गरी जम्मा ५०९ जनाको उम्मेदवारी परेको हो ।