हामी सबैकाे संसारन्यूज

निरू गौतम, मोरङ

फेरि साँढेहरुको
साँढे जुधाइ सुरु भयो
आफ्नो वजन र ताकतको
हुङ्कार देखाउन लामा
सिंङमा तेल दलेर
वल्लो कान्लो र पल्लो
कान्लोमा दौडिदै
सिंगौरी खेल सुरु भयो
सत्ताको उन्नतशील
दाना खाएर
चिल्लिएका अनगिन्ती
साँढेहरु,
जनताको पसिना
चुसेर मोटाएका
किर्नाहरु,
देशको अस्मिता बेचेर
करोडपति बनेका
कङ्गालपतिहरु,
फेरि झुटो आश्वासनको
चारो छरेर
जनतासँग सुनको
अण्डा खोस्न
घिउ चिनी मिसाएर
बाँड्न आतुर देखिदैछन्
प्रजातन्त्रको नाममा
लुटतन्त्रको झोला
भिरेर गाउँ पस्दै छन्
जनअपेक्षा हैन,
मनअपेक्षाको
मूर्तता दिन डुक्रिदै छन्
हिलहिलाउँदै छन्
होसियार होऊ तिमी,
साँढेको गर्जनलाई
साधाको प्यारलाई
अन्तरात्माले चिन !
ममताले छोप !!
विश्वासले जित, !!