Sansar News
विनोद रसाइली
खर्साङ, भारत
तिमीलाई यो आँखाको डिलबाट
कतै खस्न नदिऊँ भनेको
तिमीलाई यो मनको
मझेरीबाट कतै नपठाऊँ भनेको
तिमीलाई यो मुटुको धड्कनजस्तो
बाँचुञ्जेल नहराऊँ भनेको
तर
पतझडमा रूखलाई पातहरू नखसोस् जस्तै भो ।
तिमीलाई गफहरूमा सँधै
अल्झाई राखूँ भनेको
ईश्वर जति सबै
तिम्रो निम्ति भाकूँ भनेको
चोटहरू समेत
तिम्रो निम्ति चाखूँ भनेको
तर
शीतको थोपा बोकेर
मानेको पातहरू नहल्लिओस् जस्तै भो ।
तिमीसँगको रातहरूले
तिमीसँगको बातहरूले
तिमीसँगको साथहरूले
आयुको सबै कीर्तिमान तोड़ूँ भनेको
तर
पहिलो उडानमा नै छिचिमिरालाई
आफ्नो उमेर नसकिओस् जस्तै भो ।
वि.सं.२०७९ जेठ २१ शनिवार ०९:०० मा प्रकाशित
