हामी सबैकाे संसारन्यूज

काठमाडौं । माओवादी केन्द्र अध्यक्ष पुष्पकमल दाहाल ‘प्रचण्ड’ले आइतबार दिउँसो ३ बजेका लागि स्थायी समितिको बैठक डाकेका थिए । स्थायी समिति बैठकमा सांगठनिक विषयसँगै अर्थमन्त्री नियुक्तीको विषयमा छलफल गर्ने कार्यसूची थियो । स्थायी समितिका नेताहरुलाई पनि सोही विषयमा ब्रिफिङ्ग गरिएको थियो ।

तर, दिउँसो ३ बजेका लागि निर्णय लिन बैठक डाकेका अध्यक्ष प्रचण्डले नेताहरुलाई थाहै नदिइ जनार्दन शर्मालाई नै अर्थमन्त्रीको रुपमा सिफारिस गरेका छन् । उनले आइतबार बिहान प्रधानमन्त्री शेरबहादुर देउवालाई भेटेर नियुक्तीको सिफारिस गरेका हुन् ।

प्रचण्डको सिफारिसअनुसार शर्मालाई आज नै अर्थमन्त्रीको रुपमा सपथ गराउने तयारी छ । प्रधानमन्त्रीको कार्यालय र राष्ट्रपतिको कार्यालयले सो विषयमा तयारी गरिरहेको छ ।

संसदीय समितिले करको दर हेरफेर गरेको प्रकरणमा शर्मालाई सफाई दिएसँगै माओवादीभित्र उनैलाई दाहोर्‍याउने कि नयाँलाई पठाउने भन्ने विषयमा छलफल चलिरहेको थियो । नेता लिलामणि पोखरेलका अनुसार शर्मालाई नियुक्ती गर्ने वा नगर्ने भन्ने विषयमा आजको बैठकले निर्णय लिँदै थियो ।

गृहजिल्ला सिन्धुली पुगेका हरिबोल गजुरेल पनि अर्थमन्त्रीको विषयमा निर्णय लिन बोलाइएको स्थायी समिति बैठकका लागि काठमाडौं आउँदै थिए । उनले आजको बैठकबाट अर्थमन्त्रीको नियुक्तीको विषयमा निर्णय हुने संसार न्यूजलाई बताएका थिए ।

तर, बैठक अघि नै उनको नियुक्तीको सिफारिस प्रचण्डले गरिसकेका छन् । जसबारे पोखरेल र गजुरेल मात्रै होइन सबैजसो स्थायी समिति सदस्य अन्योलमा छन् ।

बाहिर जस्तै माओवादीभित्र पनि केहीले प्रश्न उठेको हुनाले नैतिकतामा हेक्का राख्दै शर्मालाई दोहोर्‍याउने वा नदोहोर्‍याउने भन्ने विषयमा निर्णय लिनुपर्ने बताउँदै आएका थिए । उनीहरुले अर्थमन्त्रालयमा अर्को पात्रलाई पठाउन तयार हुनुपर्ने धारणा पनि राखेका थिए । तर, प्रचण्डको एकल निर्णयसँगै विषय टुंग्गीएको छ । पछिल्लो निर्णयले माओवादीभित्र असन्तुष्टी बढाउन सक्ने देखिन्छ ।

सम्बन्धित समाचार

अर्थमन्त्रीमा फेरि जनार्दन शर्मा