हामी सबैकाे संसारन्यूज

काठमाडौं । एनआईबिएल एस क्याप्टिलले मर्चेन्ट बैंकिंग तथा इन्भेष्टमेन्ट बैंकिंग क्षेत्रमा सेवा प्रदान गर्दै आएको आज १० वर्ष पूरा भएको छ । १० वर्षे अवधिमा क्यापिटलले १८८ कम्पनीको आईपिओ तथा विभिन्न कम्पनीको हकप्रद शेयर निष्काशनका लागि निष्काशन तथा बिक्री प्रबन्धकको रुपमा समेत कार्य गरेको छ ।

क्याप्टिल हाल ५१ कम्पनीको शेयर रजिष्ट्रारको रुपमा समेत कार्यरत छ । क्याप्टिलले योजना व्यवस्थापक रही “एनआईबिएल म्युचुअल फण्ड” अन्तर्गत तीन वटा बन्दमुखी र एक खुलामुखी म्युचुअल फण्ड योजनाहरू सञ्चालनमा ल्याइसकेको जनाएको छ । जसमध्ये एनआईबिएल समृद्धि फण्ड–१ परिपक्क भई आफ्नो इकाईधनीहरुलाई रकम समेत फिर्ता गरिसकेको छ । साथै नयाँ बन्दमुखी योजना “एनआईबीएल ग्रोथ फण्ड” नेपाल धितोपत्र बोर्डमा पेश भई प्रारम्भिक समीक्षाको चरणमा रहेको क्यापिटलले जनाएको छ ।

क्यापिटलका अनुसार  ७०० भन्दा बढि लगानीकर्तालाई लगानी व्यवस्थापन सेवा प्रदान गर्दै आइरहेको छ भने आफ्नो संस्थागत परामर्श सेवा अन्तर्गत ३४ कम्पनीलाई सेवा प्रदान गर्दै आइरहेको छ । हालसम्म कम्पनीले ३ लाख ग्राहकवर्गलाई डिम्याट खाता तथा २.२५ लाख ग्राहकवर्गलाई मेरो शेयर सेवा समेत प्रदान गर्दै आइरहेको जनाएको छ ।

क्यापिटलले १० वर्ष पूरा गरेको अवसरमा प्रदान गर्दै आइरहेको सेवाहरुमा विशेष छुटका साथै ग्राहकलाइ लक्षित गरी विभिन्न योजनाहरु ल्याएको छ । जस अनुसार क्यापिटलले डिम्याटको वार्षिक नविकरण शुल्कमा १० वर्षको अग्रिम भुक्तानीमा थप १० वर्ष निः शुल्क नविकरण सेवा दिने तथा रु १० मा बजार विशेषज्ञ सेवा दिने जनाएको छ ।