हामी सबैकाे संसारन्यूज

मचिन्द्र खत्री, धरान, सुनसरी

दीपक बल्दछ तेलभए तब पार्दछ झल्मल रात पनि,
खुल्दछ जीवन सार्थक यो जब बुझ्दछ मानव सार अनि ।
कल्कल बग्दछ नीरनदी तट, शान्तछ निर्मल कञ्चन यो,
शीतल छर्दछ जीवन भर्दछ, छैनकतै बुझ चञ्चल यो ।।१।

बादल उड्दछ यो जल बोक्दछ पोख्नुछ कर्म सदा उसको,
बाँच्दछ यो घर हाँस्दछ यो चर जीवन चल्दछ यो जस हो ।
वायु अदृश्यछ तैपनि नित्यछ भर्दछ सास सबै जनको,
तेजछ देह र राप सदा तब चल्दछ जीवन यो मनको ।।२।

मानव जीवन कर्मगरे तब मिल्दछ मान र सान जता,
सार्थक कर्मछ जीवनयापन जान र यो गर कर्म यता ।
गर्दछ भन्भन यो भँमरो रस पाउँछ फूलफुले वनमा,
सज्जन मानव जान्दछ यो सब चञ्चल छैन कतै मनमा ।।३।

देह त नाशछ मिल्दछ यो जब तत्त्वसबै जगको घरमा,
तेज र वायु उडे जल मिल्दछ निर्मल निर्मल यो जलमा ।
के छ र सृष्टिबुझे जनले तब नाटक मात्रछ जीवन यो,
यो सब बुझ्दछ जो जनमानव जीवन बुझ्दछ सार्थक हो ।।४।

मौनछ पर्वत मौनछ सागर चञ्चल छैनकतै डरको,
भूमिछ उर्वर पाल्दछ जीवन अन्न र बन्दछ यो भरको ।
ज्ञानछ यो सब बुझ्नुछ मानव चल्नुछ यो पथ जीवन हो,
ईश्वर रूपछ यो भवसागर बुझ्नुछ पुज्नुछ यो धन हो ।।५।

छन्द : मदिरा
शब्द र अर्थ,चर : अस्थिर,चलायमान, जिउँदो, हिँडिरहने ।