हामी सबैकाे संसारन्यूज

बाबुराम न्यौपाने “उत्स“, दमक, झापा

१
विरहीरात प्रतीक्षामै ढलेर गयो
प्रेमको रङ्गीन गलैंचा जलेर गयो
फेरि वेदनाले आहत भएकै बेला
मीठो सपनाले पनि छलेर गयो ।

२
ऋण र रेमिटेन्सबाट चलेको छ देश
शासक वर्गको लागि फलेको छ देश
सिद्धान्तको चिता सजाउनेको के कुरा
उनकै दागबत्तीबाट जलेको छ देश ।

३
गरीब हुनु पाप भएको भए
धनीहुनु फलिफाप भएको भए
मृत्युको न्याय समान हुनेथिएन
जन्मलिनु श्राप भएको भए ।

४
देश नहुनेलाई माटो के हो सोध
पथभ्रष्टलाई बाटो के हो सोध
आखिर प्रश्नहरु सोध्नै परेपछि
जिन्दगीको पाटो के हो सोध ।

५
प्रेममा जल्नुको मज्जा पनि बेग्लै छ
हारेर ढल्नुको मज्जा पनि बेग्लै छ
प्रेम त्यस्तो अपूर्व तत्व हो ! साथी
साथ चल्नुको मज्जा पनि बेग्लै छ