हामी सबैकाे संसारन्यूज

“इलामे जेठो“ (शिव अधिकारी), इलाम

१
कत्रो थियो जनतामा, आश अचम्म भो ।
परिणाम उल्टो भयो, त्रास अचम्म भो ।
जनता नै जनार्दन, भन्दै जप्दै गर्दा,
नेताका नै भयौं हामी, दास अचम्म भो ।

२
गन्तव्यमा पुग्न कुनै, लिख नभएका ।
साँच्चै गरी देखाउने, ईख नभएका ।
बग्रेल्ती छन् यहाँ यस्ता, गुर्वे, हरेउ, करेत,
गोमन, धामन, सर्पहरु, बिख नभएका ।

३
छिमेकीको कहाँ हुन्छ ? छिद्र घरकै हुन्छ ।
तानातान र हानाहान, द्वन्द्व चर्कै हुन्छ ।
व्यर्थै बुझ पचाएर, व्यक्ति व्यक्ति बीच,
कानुनको दफा एउटै, ब्याख्या अर्कै हुन्छ ।

४
इमानदारी सन्तान हुन्, सुन्दर घरवार ।
सन्तोषले बाँच्न सिके, त्यही दरवार ।
जति होस् न चञ्चला श्री, बेमेल भयो भने,
आफ्नै गला रेट्ने त्यही, हुन्छ तरवार !

५
एक पछि अर्को गर्दै, चुक्न थाले फेरि ।
चमत्कारै भयो भन्दै, भुक्न थाले फेरि ।
विगतका काला कर्तुत, उघ्रिने भो भन्दै,
चोखा बन्न सत्ताभित्रै, लुक्न थाले फेरि ।