हामी सबैकाे संसारन्यूज

बिष्णु थापा “बिछोड“, काठमाडौ

१
हिजोआज कसैको पनि मनमा शितल देखिएन
भाइ भाइमा फुट हुँदा एकता र बल देखिएन
सुनको कचौरा हातमा लिई माग्न हिड्ने नेता देख्दा
जनताको नजरमा यहाँ कोही असल देखिएन ।

२
मौसमले नि आज हदै च्यालेञ्ज गर्यो लौ न
धुम्म आकाश गड्याङ्गगुडुङ्ग पानी पर्यो लौ न
धेरै पछि मलाई भेट्न निस्कदै थिइन् उनी
भेट्ने इच्छा हुँदाहुँदै पनि दिन सर्यो लौ न ।

३
जिन्दगी आफैमा उत्सव हो रमाउन जान्नुपर्छ
यसैलाई सधैं हराभरा बनाउन जान्नुपर्छ
दुःख अनि पीर चिन्ता कसलाई पर्दैन र !
त्यै दुःखलाई साध्य बनाई सजाउन जान्नुपर्छ

४
आफ्नै लागी अहिले पनि लुछाचुँडी गरेका छ्न्
खोक्रो बनाई देशलाई आफ्नै भुँडी भरेका छ्न्
आऊ अब युवाशक्ति भ्रष्टाचारीलाई तह लगाउँ
अभाव र महङ्गीले लाखौ जनता मरेका छ्न् ।

५
जान्न छोरा बृद्धआश्रम तानीतानी नलग न !
तिम्रो पनि आउँछ पालो जानीजानी नलग न !
बुढेसकालको सहारा तिमी बाहेक को छ मेरो?
मुटुभित्र चोट दिएर हानीहानी नलग न ।