हामी सबैकाे संसारन्यूज

दीनानाथ पोख्रेल, इलाम

मूलहीन चिज हुन्न धरामा ।
उम्रिएर सँग बढ्छ गरामा ।।
वृद्धमूल सबका गर रक्षा ।
प्राप्त होस् विनयले गुणशिक्षा ।।०१।।

छेउमा बस गई अनि सोध ।
कर्म योग्य पथ हो हित रोज ।।
शब्द पस्क विनयीपन घोली।
बाँड्दछन् हृदयका सुख खोली ।।०२।।

फक्रँदा कुसुमले मन तान्छन् ।
पक्र अग्रजकला हितका छन् ।।
के दिए बल छँदा ? गम नित्य ।
कर्म योग्य छ बडो मन पूज्य ।।०३।।

ज्येष्ठ छैन भव यो पनि छैन ।
मिल्न सक्छ कसरी सुख चैन ।।
ज्येष्ठका डगर दृष्टि विशाल ।
बाँड प्रेम मनले बह फाल ।।०४।।

वृद्ध हुन्छ भव यो सब जान ।
पुग्छु त्यो गतिविषे खुद ठान ।।
खानपान मनको खुद देऊ ।
फिर्छ याम पछि ता सुख लेऊ ।।०५।।

होस गुम्दछ भनी मन लेऊ ।
उठ्न साहस निको बल देऊ ।।
ओखती समयमा पनि देऊ ।
वृद्ध आसिक टिपी सुख लेऊ ।।०६।।

छन्दः– स्वागता