हामी सबैकाे संसारन्यूज

अनिल भण्डारी उदास, अछाम

१
आवश्यकता हजारको छ खल्तीमा सय छैन
यसकारण मेरो अनि बजारको समन्वय छैन
फकिर हुँ परिचयको प्रस्ताव नराख महोदय
तत्काल तपाईंलाई दिन म सँग परिचय छैन

२
दुःख अभावको जंघार तर्ने जोहो गर्दागर्दै
विकट गाउँ देखी सहर सर्ने जोहो गर्दागर्दै
एकलाचार गरिबको जिन्दगी यसरी सकिन्छ
दुइछाक परिवारको पेट भर्ने जोहो गर्दागर्दै

३
छैन उपचार छैन ओखती कति बाँचिएला
दुखिरहन्छ मुटु भतभती कति बाँचिएला
जीउँदो लास भाछु अचेल बैगुनिको यादले
सकियो मनोबल भएजति कति बाँचिएला

४
नजिक आउछन् टाढिएका जति यो जमानामा
आफूसँग हुनुपर्छ मनग्ये सम्पत्ति यो जमानामा
प्रेमले सम्बन्ध बच्ने जमाना सक्की सकेको छ
पैसा हो सम्बन्ध बचाउने ओखती यो जमानामा

५
देख्छन खुसी अरू अरू खुशी कहाँ छन्
पीडा लुकाउछन् बरू खुशी कहाँ छन्
हाम्रो जिन्दगी भनेकै एउटा अभिनय हो
सबै खुशी देखिनेहरू खुशी कहाँ छन्