हामी सबैकाे संसारन्यूज

उत्तम विचार, टोखा, काठमाडौं

मदमत्त नहून् दुनियाँ मदले
नर हुन्न बडो कहिल्यै कदले ।
अति गर्नु हुँदैन हुनेछ खति
तर पुग्छ कहाँ मन भन्छ जति ।।१।

पछि पर्न पुगे पथभ्रष्टहरू
गुण हर्न पुगे मतिभ्रष्टहरू ।
बन पाठक पढ्नुछ पुस्तक
नपढी किन बढ्दछ मस्तक ।।२।

नहिँडी कसरी गति पक्रनु त्यो
नफुली कसरी कलि फक्रनु त्यो ।
सुरमा अघि बढ्न सकौँ लयमा
किन जीवन बित्दछ यो भयमा ।।३।

कति गर्न सक्यौँ सकिएन कति
जति गर्न सक्यौँ बुझियोस् प्रगति ।
नबुझेर बुझी सति जानु किन
अघि बढ्न दियौँ पछि तानूँ किन ।।४।

रिसराग नहोस् किन डाह गरूँ
अघि होस् दुनियाँ म पछाडि सरूँ ।
समभाव रहोस् र अभाव नहोस्
मनशान्ति मिलोस् र दवाव नहोस् ।।५।

छन्द : तोटक
गण : IIS IIS IIS IIS