हामी सबैकाे संसारन्यूज

विष्णु थापा ’विछोड’,काठमाडौ
१.
मै नराम्रो मै खराब आखिरमा जनाई छाड्यौ
स्वार्थले भरिएको बैमान रैछ भनाई छाड्यौ
दुनियाँको नजरमा तिमी भयौ असल प्रेमी
मलाई चैँ मुर्ख पागल आवारा बनाई छाड्यौ ।

२.
नाक खुम्च्याई आँखा तर्दै रिसाएको मनपर्छ
लम्कीझम्की सँगै घुर्की मिसाएको मनपर्छ
तिम्रो आवेग मेरो माया हाँसेर म सहिदिन्छु
आफ्नै सम्झि मनको बह बिसाएको मनपर्छ ।

३.
अरुको व्यथा थाहा हुन्न डुली हिड्ने भमरोलाई
बाहिरी रुप सौन्दर्यमा भुली हिड्ने भमरोलाई
दुःख पीडा लुकाएर फूलले हाँसो छर्छ किन ?
फूलमा चोट पारी पारी झुली हिड्ने भमरोलाई

४.
गोप्य रुपले हर योजना अन्जाम लगाउनु छ
बेतोडले कुद्ने मनलाई लगाम लगाउनु छ
फूल जस्तै कोमल हुँदा चोट दिन्छन् मान्छेहरू
ढुङ्गा बनि मनलाई अब विश्राम लगाउनु छ

५.
स्वार्थ पूरा गर्नुपरे आफै शरण पर्छन्
गर्नुपरे हजुर सहयोग पर पर सर्छ्न्
बन साङ्लोले घर साङ्लोलाई सताउँछ रे हजुर
रीस किन आखिरमा नजीककाले गर्छन् ।