हामी सबैकाे संसारन्यूज

दीनानाथ पोख्रेल,इलाम

घरघर मृदु खुल्छन् गीतका दिव्य ताल ।
सब अवगुण भाग्छन् चेत टोक्ने बिहाल ।।
नव सुरलय टिप्दै डुल्छ शोभा जगत्को ।
झिलिकमिलिक राम्रो खुल्छ शोभा शरद्को ।।०१।।

खुस दिल अझ कौवा डुल्छ पाएर खान ।
कुकुर पनि रमाई नाच्छ पाएर मान ।।
मन बह जन भुल्छन् भाग्छ पीडा विपत्को ।
झिलिकमिलिक राम्रो खुल्छ शोभा शरद्को ।।०२।।

मनुजमन फुकाई मेलमा शान्ति लिन्छन् ।
अकलुष मन बन्दा सौख्यको सार चिन्छन् ।।
भवभर हित डुल्दा छैन पीडा असत्को ।
झिलिकमिलिक राम्रो खुल्छ शोभा शरद्को ।।०३।।

प्रकृतिसित मितेरी लाउँछन् व्यक्ति खास ।
हितसित मन खुल्दा हुन्न मान्छे निराश ।।
सुरपुरसरि खुल्ने भव्य आभा जगत्को ।
झिलिकमिलिक राम्रो खुल्छ शोभा शरद्को ।।०४।।

निज भवन दिदीले डाक्दछिन् भाइलाई ।
खुद घर बहिनीले डाक्दछिन् दाइलाई ।।
हृदय जलन झर्को कर्म भाग्यो असत्को ।
झिलिकमिलिक राम्रो खुल्छ शोभा शरद्को ।।०५।।

अविरल मृदु बास्ना फूल बाँड्छन् फुलेर ।
मनुजमन रमाई हर्ष साट्छन् डुलेर ।।
भुवनभर डुलेको राज देखिन्छ सत्को ।
झिलिकमिलिक राम्रो खुल्छ शोभा शरद्को ।।०६।।

( समस्या : झिलिकमिलिक राम्रो खुल्छ शोभा शरद्को ।)

छन्द : मालिनी
विश्राम : आठौँ अक्षर र पादान्तमा
गण : न न म य य
सङ्केत :  III –  III – SSS – ISS – ISS