Sansar News
जानुका गुरागाईँ, झापा
जजसका जिन्दगीमा मन दुखेका सम्झना हुन्छन्
तिनैका पनि खुसीले दिन बितेका सम्झना हुन्छन्
कतै खानेकुरा देख्दै छु फालेको कसैद्वारा
कसैसङ्ग बसी भोकै गलेका सम्झना हुन्छन्
गयो जोबन कसैको ख्यालख्यालैमा भने बुझ्नू
ती मान्छेसित विगतमा खुब रमेका सम्झना हुन्छन्
सँगै बस्नेहरूका प्रीतले सन्तुष्ट हुन्छन् दिल
भुली जानेहरूका तर बढेका सम्झना हुन्छन्
बनी निर्दोष छुट्ने भ्रष्टका मनमा निसन्देह
लगाई दोष अरूलाई छुटेका सम्झना हुन्छन्
बहर : हजज मुसम्मन सालिम
अर्कान : १२२२ – १२२२ – १२२२ – १२२२
वि.सं.२०८० माघ १३ शनिवार ०७:२३ मा प्रकाशित
