हामी सबैकाे संसारन्यूज

यम रेग्मी, दाङ

देख्दैछु रैती भुसुना समान
हुँ सृष्टि कर्ता अरु हुन् मसान ।
ऐरेलु लाग्छन् उपदेश तिम्रा
लाग्दैछ यस्तो म हुँ सर्वसर्वा ।
१
उडेर आफैँ नभसम्म आएँ
ब्रह्माण्ड जस्तो तह यो बनाएँ ।
चाहा छ देख्नै नपरोस् स्वजाति
हेर्नै कसैले नसकोस् म माथि ।
२
सबै हिजोका इतिहास च्यात्छ
मबाट जेठो सुरुवाद थाल्छु ।
गरिन्छ मस्ती रसरङ्ग खोज्दै
के गर्न सक्छौ भुइँमाझ भुक्दै ?
३
देख्दैन धर्ती म छु स्वर्गमाझ
सुवर्ण मान्छे हुँ नमाग गाँस
तारा धरामा छ कहाँ झरेको ?
अम्बा धुलोमा छ कहाँ फलेको ?
४
जहाँ छ बाली असिना खसाल्छु
जहाँ छ बस्ती पहिरो पसाल्छु
बनेर आधी झुपडी बडार्छु
जे लाग्छ इच्छा सब नष्ट पार्छु ।
५
पुछार झर्ने दिन आन्न कालो
लाग्दैन मेरो पथमा तुँवालो
जताततै छन् जयकार मन्त्र
अनन्त आरम्भ म मात्र एक ।
६
म काललाई पनि मार्न सक्छु
म यामलाई पछि सार्न सक्छु
रोकिन्छ हावा म गरे इसारा
खसाल्छु चाहे नभ जून तारा ।
७

छन्द: उपजाति (इन्द्रवज्रा+उपेन्द्रवज्रा)
गणः त त ज गुरु गुरु
ज त ज गुरु गुरु
गण सङ्केत : SSl  SSl SlS  S S
विश्रामः पाँच अक्षरमा