हामी सबैकाे संसारन्यूज

इलामे जेठो (शिव अधिकारी )
लुम्बाक,इलाम

१.
सभ्यताको प्रतीक हो, जान हाम्रो टोपी ।
पहिचानको आधार हो, मान हाम्रो टोपी ।
सुरक्षाको कवच सरी , नेपालीको गौरव ,
सगरमाथा सरी उच्च शान हाम्रो टोपी ।

२.
नेतृत्वमा अहिले यस्तो चलन भएको छ ।
अमृतको साटो जहर स्खलन भएको छ ।
जहरकै दुष्प्रभाव जनतामा पर्दा,
न त मर्नु न बाँच्नुको जलन भएको छ ।

३.
आकाश जस्तै तिम्रो मुहार खुलिरहोस् सधैँ ।
उन्नतिले सबै पाटा चुलिइरहोस् सधैँ ।
शुभकामनाका गुच्छा तिमीलाई यत्ति,
गुलाफ झैँ तिम्रो जीवन,फुलिरहोस् सधैँ ।

४.
बर्कतले भ्याएसम्म कुद्न सक्नुपर्छ ।
विघ्न बाधा अघि आए जुध्न सक्नुपर्छ ।
समस्याको बीचबाटै अवसर आउने हो,
चुरो कुरो कहाँ के छ ? बुझ्न सक्नुपर्छ ।

५.
अलिअलि खाँदैछ र, अलिअलि पिउँदैछ ।
जतातिर फाट्छ यो मन्, त्यतैत्यतै सिउँदैछ ।
अलिअलि सिउँदै र, अलिअलि हजुरहरुको,
आशिर्वादले त यो ‘शिव’,अहिलेसम्म जिउँदै छ ।