हामी सबैकाे संसारन्यूज

निर्मल रमण पराजुली,समाखुशी, काठ्मान्डौ

१.
छोरी जन्मिई खुशी भए, ठुली बनाएँ बढाएर
सक्षम पारे ज्ञानी पारे, भने जस्तै पढाएर
आफ्नै आँगन पोली, उस्को गोत्र अन्तै सारि
रुदै रुदै पठाउदै छु, उसलाई डोली चढाएर …

२.
छोराले वंश चलाउछ भनी, समाजमा भ्रम छर्नेहरू
छोरीलाई भार सम्झी, गर्भमै हत्या गर्नेहरू
आजकल बृद्ध आश्रममा, बसेर पछुताई रहेछन्
छोरी होईन छोरै पाउँ भनि, ईश्वरको शरण पर्नेहरू …

३.
एउटा राम्रो सन्देश लेखी, पठाउ त्यो ठाउँमा
काम गर्ने सङ्घ संस्था, खटाउ त्यो ठाउँमा
छाउ गोठभित्र अझै कति, चेलीबेटी मर्न दिने
सबै मिली त्यस्तो प्रथा, हटाउ त्यो ठाउँमा …

४.
आफ्नी छोरी जस्तै प्रिय, बुहारी पनि सोचिदिए
छोरिको भाव बुहारी कै, अनुहारमा खोजिदिए
पक्कै पनि सुन्दर बन्छ, हाम्रो सामाजिक परिवेश
बुहारी विधवा हुँदा, फेरि असल वर रोजिदिए …

५.
म जानि जानि दुःख दिन्न, कहिल्यै तिम्रो आँसु झार्दिन
जस्तै संकट आओस् मायाँमा, पाईला अन्त सार्दिन
मेरो आराधना तपस्या तिमी, यो जन्म अनि जन्मान्तर
म जिउँदै हँदासम्म तिमीलाई, कहिल्यै एक्लो पार्दिन…