हामी सबैकाे संसारन्यूज

बाबुराम न्यौपाने ‘उत्स’, झापा

महान् युद्ध जितेर पनि
विकलांग सिपाहीको नियति
भोगिरहेको छ देश
नत
कोतपर्वको रगतको बाछिटाले
नत
नारायणहिटी वंशविनाशले
भारदारहरुको चेत खुल्यो
क्रान्तिका असरल्ल चित्कारहरु
बारुदको धूवाँमा
फूलको सुगन्ध खोजिरहेका छन् ।

हे !! मातृभूमि
तिम्रो कोमल गर्भाशय
बाँझो बनाएर
तिम्रा कुटिल रक्षकहरु
लोकतन्त्रको राँको
आफ्नै सन्तानको चितामा झोस्दै
बेमौसमी उत्सव मनाउन व्यस्त छन् ।

नायकहरुले सुनको सिंहासनमा
दिउँसै झुण्डिएर
सामूहिक
आत्मदाह गरेको समाचार
सञ्चारमाध्यामबाट प्रसार भईरहेको छ
यो शोकधुनमा
म कस्तो संगीत भरौँ ?
म रनभुल्लमा परेको समय हो यो ।