Sansar News
भूपाल अधिकारी, बिराटनगर
उनी रुझ्दा झरी बन्ने अनौठो चाहनाभित्र
उनैको मोहनी तस्बिर सजाएँ कल्पनाभित्र
सियोले झैँ ह्दयमा घोच्छ भन्थेँ यादले उनको
बने मान्छेहरू मुर्दा हमेशा सम्झनाभित्र
सबै भन्छन् जवानी होस् सधैँ बाँचौँ सधैंँ धन होस्
हुँदै प्यासी त्यसै मर्छन् भुवनमा तिर्सनाभित्र
नमार्नू चेतना तिम्रा हे जिउँदा लास बन्ने हो
नबाँच्नू झन् किराजस्तो बेहोसी मुर्च्छनाभित्र
अझै बन्दुकका कुञ्जाले गरिब लाचार ठोकेमा
यहाँ भीषण प्रलय उठ्ला चरम हर यातनाभित्र
बहर : हजज मुसम्मन सालीम
१२२२ , १२२२ , १२२२ , १२२२
वि.सं.२०८१ जेठ २६ शनिवार ०७:२६ मा प्रकाशित
